રાધનપુર નગરપાલિકામાં આજે શહેરીજનોએ સ્વચ્છતા બાબતે નગરપાલિકા કચેરીમાં હોબાળો મચાવ્યો હતો. સ્થાનિક લોકોએ શહેરની ગંદકી ઉપાડી નગરપાલિકામાં ચીફ ઓફિસરની કચેરીમાં મુકી વિરોધ વ્યક્ત કર્યો હતો. રાધનપુર નગરપાલિકા તંત્રની ધીમી કામગીરીના કારણે રાધનપુરના નાગરિકોને અનેક મુશ્કેલીઓનો સામનો કરવો પડી રહ્યો છે. શહેરીજનોને વીજળી, પાણી, સ્વચ્છતા જેવી પ્રાથમિક સુવિધાઓ મળતી ન હોવાથી પાલિકા પ્રત્યે લોકોમાં રોષ જોવા મળી રહ્યો છે. બુધવારે રાધનપુર શહેરના લોકોએ વિસ્તારનો કચરો એકઠો કરી પાલિકામાં લાવી ચીફ ઓફિસરની ચેમ્બરમાં રાખ્યો હતો. ચીફ ઓફિસર સામે સૂત્રોચ્ચાર કરી પ્રાથમિક સુવિધાઓ પુરી પાડવા માંગ કરી હતી. મહિલા સાથે રાધનપુર નગરના લોકોએ પાલિકામાં હોબાળો મચાવ્યો હતો.