વાવ તાલુકાના તડાવ-ચોટીલ સુધીનો મુખ્ય માર્ગ એક માસ અગાઉ પડેલા વરસાદના કારણે મુખ્ય માર્ગ પર પાણી ભરાઈ જવાના કારણે ખાડામાં ફેરવાઈ ગયો છે. ચોટીલ ગામના જાગૃત નાગરિક હરેશ ચૌધરીએ મીડિયાને જણાવ્યું હતું કે, તડાવ-ચોટીલનો મુખ્ય માર્ગ પાણી ભરાવાને કારણે બેટમાં ફેરવાઈ ગયો છે. જેમાં તડાવથી 5 કિમી દૂર ચોટીલ જવા માટે ફાંગડી થઈને પછી 10 કિમી ખડકાળ રસ્તા પર જવું પડે છે. જેના કારણે લોકોના સમયનો પણ બગાડ થઈ રહ્યો છે. આ ઉપરાંત પાણી ભરાવાના કારણે પ્રદુષણ અને મચ્છરોનો ઉપદ્રવ પણ વધ્યો છે. જેના કારણે ભવિષ્યમાં મચ્છરજન્ય રોગોમાં પણ વધારો થાય તો નવાઈ નહીં. ત્યારે આ સમગ્ર મામલે વાવના મહિલા ધારાસભ્ય આ રોડની મુલાકાત લઈ તંત્રનો યોગ્ય રીતે સામનો કરી ગામના લોકોને ન્યાય આપે તેવી ઉગ્ર માંગ ઉઠી છે.