ગુજરાતઃ વડાપ્રધાન નરેન્દ્ર મોદી 9 જાન્યુઆરીએ વાઈબ્રન્ટ ગુજરાત સમિટ 2024 માટે ગુજરાતની મુલાકાતે આવશે. વડા પ્રધાન નરેન્દ્ર મોદી 9 જાન્યુઆરીએ વાઇબ્રન્ટ ગુજરાત સમિટની 10મી આવૃત્તિનું ઉદ્ઘાટન કરતાં પહેલાં વૈશ્વિક વેપાર શોમાં હાજરી આપશે. આ પછી તેઓ બીજા દિવસે વાઈબ્રન્ટ ગુજરાત ગ્લોબલ સમિટનું ઉદ્ઘાટન કરશે.
આ પ્રસંગે વડાપ્રધાન નરેન્દ્ર મોદી વિશ્વભરના ઉદ્યોગપતિઓ અને રોકાણકારોને સંબોધિત કરશે. કોરોનાના કારણે ચાર વર્ષ બાદ વાઈબ્રન્ટ ગુજરાત સમિટનું આયોજન કરવામાં આવી રહ્યું છે. છેલ્લી સમિટ 2019માં યોજાઈ હતી. વડા પ્રધાન નરેન્દ્ર મોદી જ્યારે મુખ્ય પ્રધાન હતા ત્યારે તેમણે ગુજરાતમાં રોકાણકારોને લાવવા માટે આ સમિટની કલ્પના કરી હતી અને પહેલ કરી હતી. વિશ્વના 28 દેશો આ સમિટ માટે ભાગીદાર બન્યા છે, જ્યારે 14 સંસ્થાઓ ભાગીદાર બની છે.
આટલું જ નહીં, યુનાઈટેડ આરબ અમીરાત (યુએઈ)ના પ્રમુખ મોહમ્મદ બિન ઝાયેદ અલ નાહયાન, મોઝામ્બિકના રાષ્ટ્રપતિ ફિલિપ ન્યુસી અને એક વરિષ્ઠ રશિયન મંત્રી વાઈબ્રન્ટ સમિટમાં ભાગ લેવા ગુજરાત આવશે. તેમજ કોર્પોરેટ અને બિઝનેસ જગતના એક લાખથી વધુ લોકો અમદાવાદ અને ગાંધીનગર આવશે. ત્યારે રાજ્ય સરકાર દ્વારા સમિટની તૈયારીઓ પૂરજોશમાં કરવામાં આવી રહી છે.
વાઈબ્રન્ટ ગુજરાત ગ્લોબલ સમિટની 10મી આવૃત્તિ ઘણી રીતે મહત્વપૂર્ણ છે. સમિટમાં રોકાણનો નવો રેકોર્ડ સર્જાવાની આશા છે. વાઈબ્રન્ટ ગુજરાત સમિટમાં અનેક મોટી જાહેરાતો થવાની શક્યતા છે. મૂડીરોકાણને આકર્ષિત કરવાના સાહસિક નિર્ણયમાં ગુજરાત સરકારે ગિફ્ટ સિટીમાં દારૂબંધી હટાવી લીધી છે. તેની અસર આ સમિટમાં પણ જોવા મળી શકે છે.