સૌરાષ્ટ્ર અને દક્ષિણ ગુજરાતમાં વરસાદનું જોર વધશે, 18 જુલાઈ પછી ભારે વરસાદની આગાહી
અમદાવાદમાં ગાજવીજ સાથે છૂટાછવાયા વરસાદની શક્યતા છે. રાજ્યમાં સિઝનનો 60 ટકાથી વધુ વરસાદ થયો છે. સૌરાષ્ટ્ર અને દક્ષિણ ગુજરાતમાં વરસાદનું જોર વધશે. 18મી જુલાઈ બાદ વરસાદનું જોર ફરી વધશે. રાજ્યમાં આગામી સાત દિવસ સામાન્ય વરસાદ રહેશે. હવામાન વિભાગના જણાવ્યા અનુસાર આગામી સાત દિવસ સુધી રાજ્યમાં સામાન્ય વરસાદની સંભાવના છે. ઉત્તર ગુજરાત અને મધ્ય ગુજરાતમાં મધ્યમ વરસાદની શક્યતા છે.
ભાવનગરના મહુવાના કોંજલી ગામમાં ધોધમાર વરસાદ પડ્યો હતો. મહુવા સબડિવિઝનના કુંભણ, રાજાવદર, બોરડી સહિતના ગામોમાં વરસાદ પડ્યો હતો. જ્યારે મહુવાના કોજાલી ગામે રૂપાવો નદીનું પાણી ઉછળતાં લોકોને ભારે હાલાકી ભોગવવી પડી હતી. સરકારી પ્રાથમિક શાળામાં ઘૂંટણિયે પાણી ભરાઈ જવાને કારણે મુશ્કેલીનો સામનો કરવો પડી રહ્યો છે.
હવામાન વિભાગની આગાહી વચ્ચે સૌરાષ્ટ્રના અનેક વિસ્તારોમાં વરસાદી માહોલ જામ્યો છે. સૌરાષ્ટ્રમાં અવિરત વરસાદ પડી રહ્યો છે. જૂનાગઢના કેશોદમાં 6 કલાકમાં 5.5 ઈંચ વરસાદને કારણે બજારો પાણી ભરાઈ ગઈ હતી. દુકાનોમાં પાણી ભરાઈ જવાથી વેપારીઓને ભારે નુકસાન વેઠવું પડ્યું હતું. જૂનાગઢના માંગરોળમાં એક ઇંચથી વધુ વરસાદ નોંધાયો હતો. રાજકોટના ધોરાજીમાં ભારે પવન સાથે મુશળધાર વરસાદને કારણે અનેક માર્ગો પર પાણી ભરાયા હતા.