સુરતઃ પશ્ચિમ બંગાળની કુખ્યાત આંતરરાષ્ટ્રીય ગ્વાલા ગેંગને ઝડપવામાં સુરત ક્રાઈમ બ્રાન્ચને સફળતા મળી છે. પોલીસે 5 આરોપીઓની ધરપકડ કરી તેમની પાસેથી કુલ રૂ. 2.43 લાખનો મુદ્દામાલ કબજે કર્યો છે. જ્યારે બિહાર, વાપી, ઉત્તર પ્રદેશ અને સુરતમાં કુલ 5 ગુનાઓ ઉકેલાયા છે.
સુરતમાં, 12 જુલાઈના રોજ, 12.30 વાગ્યાની આસપાસ, પાર્લે પોઈન્ટ, ધીરજ સન્સની બાજુમાં આવેલી ગલીમાં મસ્કતી પ્લોટના જાહેર માર્ગ પરથી એક બાઇક પર આવેલા બે વ્યક્તિઓએ સિનિયર સિટિઝનના ખભાની થેલી આંચકી લીધી હતી. થેલામાંથી રૂ.2.10 લાખ રોકડા અને રૂ.4 હજાર તથા મોબાઇલ ફોન અને આધારકાર્ડ મળી કુલ રૂ.2.19 લાખની મત્તાની ચોરીના આ સમગ્ર મામલે ઉમરા પોલીસ મથકમાં ગુનો નોંધવામાં આવ્યો છે.
આ ઘટનાની તપાસ કરી રહેલી સુરત ક્રાઈમ બ્રાન્ચની ટીમે પશ્ચિમ બંગાળની કુખ્યાત આંતરરાષ્ટ્રીય ગ્વાલા ગેંગને વાપી કબરીસ્તાન રોડ સ્થિત જૂના બસ સ્ટેન્ડ પાસેથી ઝડપી પાડી હતી. પોલીસે મનોજ ઉર્ફે સિન્ટુ રાજુ ગ્વાલા (40), રાહુલ શશી યાદવ ઉર્ફે ટીપુ રણજીત ગ્વાલા (30), ટિંકુ અધિક ગ્વાલા (42), બાલા લાલજી યાદવ (40) અને અવિનાશ રાજેશ યાદવ (25)ની ધરપકડ કરી હતી.
પોલીસે આરોપીઓ પાસેથી 3 મોટર સાયકલ, 61 હજાર રૂપિયા રોકડા, 4 મોબાઈલ, 4 નકલી આધાર કાર્ડ, 5 સીમ કાર્ડ, વીમા કંપનીની લેમિનેશન ફોટો કોપી વગેરે રૂપિયા 2.43 લાખની કિંમતનો મુદ્દામાલ કબજે કર્યો હતો. આ સાથે પોલીસ તપાસમાં સુરતના ઉમરા, વાપી ટાઉન પોલીસ, ઉત્તર પ્રદેશ અને બિહારમાં નોંધાયેલ વાહન ચોરીઓ મળી કુલ 5 ગુનાનો ભેદ ઉકેલાયો છે.