આજે સવારે 6 થી સાંજના 4 વાગ્યા સુધીના 10 કલાકમાં રાજ્યના 51 તાલુકાઓમાં વરસાદ પડ્યો હતો.
ગુજરાતમાં એક મહિનાના વિરામ બાદ ફરી વરસાદ શરૂ થયો છે. હવામાન વિભાગે 11 સપ્ટેમ્બર સુધી રાજ્યના વિવિધ ભાગોમાં વરસાદની આગાહી કરી છે. ગાંધીનગર ખાતે સ્ટેટ ઇમરજન્સી ઓપરેશન સેન્ટર દ્વારા રજૂ કરાયેલા આંકડાઓ મુજબ આજે દિવસ દરમિયાન સુરત જિલ્લાના ઉમરપાડા તાલુકામાં સૌથી વધુ 3 ઇંચ વરસાદ નોંધાયો છે.
આજે સવારે 6 થી સાંજના 4 વાગ્યા સુધીના 10 કલાકમાં રાજ્યના 51 તાલુકાઓમાં વરસાદ પડ્યો હતો. આ ઉપરાંત ડાંગ જિલ્લાના વઘઈ તાલુકામાં 2 ઈંચ, આહવા તાલુકામાં 2.5 ઈંચ અને સુબીર તાલુકામાં 1.5 ઈંચ વરસાદ નોંધાયો છે. આ ઉપરાંત નર્મદા જિલ્લાના ડેડિયાપાડા તાલુકા અને છોટા ઉદેપુર તાલુકામાં 1.25 ઈંચ વરસાદ નોંધાયો છે.
ગત રાત્રિથી ગુજરાતના વિવિધ ભાગોમાં હવામાનમાં પલટો જોવા મળ્યો હતો. હવામાન વિભાગની આગાહી મુજબ વરસાદના કારણે વાતાવરણમાં ઠંડક પ્રસરી જતાં લોકોએ રાહતનો શ્વાસ લીધો હતો. બીજી તરફ ખેડૂતોમાં પણ ખુશી જોવા મળી હતી.
સુરત જિલ્લાના ઉમરપાડામાં બપોરે 12 થી સાંજના 4 વાગ્યા સુધીમાં 81 મીમી વરસાદ નોંધાયો હતો. છેલ્લા 2 કલાકના વરસાદના આંકડા પર નજર કરીએ તો ઉમરપાડામાં 58 મીમી, ડાંગમાં વઘઈમાં 35 મીમી, સુબીર 30 મીમી, આહવા 27 મીમી અને નર્મદા ડેડીયાપાડામાં 32 મીમી અને મહેસાણાના સતલાસણા અને મહિસાગરના વિરપુર તાલુકામાં 24 મીમી વરસાદ નોંધાયો છે.