મુંબઈઃ પસાર થતા વર્ષ 2023માં દેશના સેકન્ડરી ઇક્વિટી માર્કેટની સાથે સાથે પ્રાઇમરી માર્કેટે પણ દેશના રોકાણકારોને સારું વળતર આપ્યું છે. વર્ષના અંતે 59 પ્રારંભિક જાહેર ભરણાં (IPO)માંથી, 55 હાલમાં તેમના સંપૂર્ણ મૂલ્યથી ઉપર ટ્રેડ થઈ રહ્યાં છે.
વિશ્લેષણમાં જાણવા મળ્યું છે કે 59 લિસ્ટિંગનું સરેરાશ લિસ્ટિંગ રિટર્ન 26.30 ટકા હતું.
સેકન્ડરી માર્કેટમાં ભારતીય શેરોના ઉછાળાને કારણે રિટેલ રોકાણકારો પણ પ્રાઈમરી માર્કેટ તરફ મજબૂત રીતે આકર્ષાયા છે. 2023માં નિફ્ટી50માં 20 ટકાનો વધારો થયો છે જ્યારે નિફ્ટી મિડકેપ 100 અને નિફ્ટી સ્મોલકેપ 100 અનુક્રમે 46.60 ટકા અને 55.60 ટકા વધ્યા છે.
તદુપરાંત, વિદેશી સંસ્થાકીય રોકાણકારો 2023 ના અંતમાં રૂ. 1.70 ટ્રિલિયનના શેર ખરીદી રહ્યા છે, જે IPO ને ટેકો આપી રહ્યા છે. S&P BSE IPO ઇન્ડેક્સ, જે નવી લિસ્ટેડ કંપનીઓની લિસ્ટિંગ પછીની કામગીરીને ટ્રેક કરે છે, તે ચાલુ વર્ષમાં 41 ટકા વધ્યો છે. જે ઇન્ડેક્સ 30 ડિસેમ્બર, 2022ના રોજ 8786 પોઈન્ટ હતો, તે 29 ડિસેમ્બર, 2023ના અંતે વધીને 12424 પોઈન્ટ થયો હતો.
ચાલુ વર્ષમાં સ્મોલકેપ અને મિડકેપ શેરોમાં આવેલી તેજીને કારણે નવા લિસ્ટેડ શેરોમાં રોકાણકારોનો રસ વધ્યો છે, એમ શેરબજાર પર નજર રાખતા વિશ્લેષકે જણાવ્યું હતું.
ચાલુ વર્ષમાં લગભગ 2.70 કરોડ નવા રોકાણકારો માર્કેટમાં જોડાયા છે. નવા રોકાણકારો સામાન્ય રીતે મિડકેપ અને સ્મોલકેપમાં વધુ રોકાણ કરે છે.
નવી કંપનીઓના ઉમેરા સાથે BSEમાં લિસ્ટેડ શેરનું માર્કેટ કેપ પણ એક વર્ષમાં રૂ. 81.90 લાખ કરોડથી વધીને રૂ. 364.28 લાખ કરોડ થયું છે.