ઈરાનના નવા સર્વોચ્ચ નેતા મોજતબા ખમેનીએ સત્તા સંભાળ્યા બાદ પોતાના પહેલા સંદેશમાં અમેરિકા અને ઈઝરાયેલને કડક ચેતવણી આપી છે. તેમણે કહ્યું કે તાજેતરના હુમલામાં માર્યા ગયેલા દરેક ઈરાનીઓના મોતનો બદલો લેવામાં આવશે અને જો જરૂર પડશે તો સંઘર્ષના નવા મોરચા પણ ખોલવામાં આવશે. સરકારી ટેલિવિઝન પર પ્રસારિત આ લેખિત સંદેશ એક મહિલા એન્કર દ્વારા વાંચવામાં આવ્યો હતો.
આમાં ખામેનીએ કહ્યું કે ઈરાન પોતાના શહીદોના લોહીનો બદલો લેવાથી ડરશે નહીં અને આ દેશની ટોચની પ્રાથમિકતાઓમાં રહેશે. આ દરમિયાન, તેમણે કહ્યું કે અત્યાર સુધી જવાબી કાર્યવાહીનો એક ભાગ શરૂ થયો છે, પરંતુ જ્યાં સુધી તે સંપૂર્ણ રીતે પૂર્ણ ન થાય ત્યાં સુધી તે ઈરાનની પ્રાથમિકતા રહેશે.
નવા મોરચા ખોલવાની ચેતવણી
મોજતબા ખમેનીએ પોતાના સંદેશમાં કહ્યું કે ઈરાનની સૈન્ય રણનીતિ માત્ર રક્ષણાત્મક નથી. તેમણે ચેતવણી આપી હતી કે જો જરૂરી હોય તો, વર્તમાન સંઘર્ષ દરમિયાન અન્ય મોરચા ખોલવામાં આવી શકે છે, જે સમગ્ર પ્રદેશમાં તણાવને વધુ વધારી શકે છે. તેમણે એમ પણ કહ્યું કે ઈરાન પડોશી દેશોમાં સ્થિત અમેરિકી સૈન્ય મથકોને નિશાન બનાવતું રહેશે, જ્યાંથી ઈરાન વિરુદ્ધ હુમલા કરવામાં આવી રહ્યા છે.
હોર્મુઝ પર દબાણની વ્યૂહરચના
ખામેનીએ પોતાના નિવેદનમાં હોર્મુઝ સ્ટ્રેટને બંધ રાખવાના દબાણનો પણ ઉલ્લેખ કર્યો હતો. તેમણે કહ્યું કે દુશ્મનો પર દબાણ લાવવા માટે આ એક અસરકારક રીત હોઈ શકે છે. જોકે, તેમણે એમ પણ કહ્યું કે ઈરાન તેના પાડોશી દેશો સાથે મૈત્રીપૂર્ણ સંબંધો જાળવી રાખવા માંગે છે.
પોતાના સંદેશમાં ઈરાનના નવા સર્વોચ્ચ નેતાએ આ ક્ષેત્રમાં કાર્યરત ‘રેઝિસ્ટન્સ ફ્રન્ટ’ના લડવૈયાઓનો પણ આભાર માન્યો હતો. યમનના હુથી બળવાખોરો, લેબનોનના હિઝબુલ્લાહ અને ઈરાકના સહયોગી જૂથોનો ઉલ્લેખ કરતા તેમણે કહ્યું કે તે બધા ઈરાનની સાથે છે. ખામેનીએ કહ્યું કે હું પ્રતિકાર મોરચાના લડવૈયાઓનો હૃદયપૂર્વક આભાર વ્યક્ત કરું છું.
