આજે ઈરાન યુદ્ધનો 25મો દિવસ છે. દરમિયાન, આ યુદ્ધ સમાપ્ત થવાની શક્યતાઓ વધી રહી છે. હકીકતમાં, એક દિવસ પહેલા, અમેરિકાએ ઈરાની ઊર્જા લક્ષ્યો પરના હુમલાને પાંચ દિવસ માટે મુલતવી રાખ્યા હતા. હવે ઈરાનના સર્વોચ્ચ નેતા મોજતબા ખમેનીએ પણ અમેરિકા સાથે વાતચીતને મંજૂરી આપી દીધી છે. પરંતુ આ મંજુરી ગુપ્ત રીતે આપવામાં આવી છે. સાઉદી અરેબિયાના મીડિયાએ આ દાવો કર્યો છે. સાઉદી મીડિયા આઉટલેટ અલ અરેબિયાના અહેવાલોમાં દાવો કરવામાં આવ્યો છે કે ઈરાનના વિદેશ પ્રધાન અબ્બાસ અરાઘચીએ ગુપ્ત રીતે અમેરિકી રાજદૂત સ્ટીવ વિટકોફને જાણ કરી હતી કે ઈરાનના સર્વોચ્ચ નેતા મોજતબા ખામેનીએ અમેરિકા સાથે વાતચીતને મંજૂરી આપી છે.
અલ અરેબિયાએ મંગળવારે ઇઝરાયેલના અખબાર યેદિઓથ અહરોનોથને ટાંકીને જણાવ્યું હતું કે ઇરાનના વિદેશ પ્રધાન અબ્બાસ અરાઘચીએ અમેરિકી રાજદૂત સ્ટીવ વિટકોફને ગુપ્ત રીતે કહ્યું છે કે સર્વોચ્ચ નેતા મોજતબા ખમેનીએ સંભવિત સમજૂતી સુધી પહોંચવા માટે વાતચીતને મંજૂરી આપી છે. જો કે, ઈરાને સત્તાવાર રીતે આવી કોઈપણ વાતચીતનો ઇનકાર કર્યો છે, જેનાથી આ સમગ્ર ઘટના પર રહસ્ય વધુ ઘેરાયું છે. રિપોર્ટ અનુસાર, ઈરાની નેતૃત્વ તેની શરતો હેઠળ યુદ્ધનો વહેલો અંત ઈચ્છે છે. યેદિયોથ અહરોનોથના સૂત્રોએ એ પણ માહિતી આપી હતી કે મોજતબા ખમેનીએ પણ ઈરાનની શરતો અનુસાર યુદ્ધને વહેલા સમાપ્ત કરવા માટે સંમતિ દર્શાવી છે.
ટ્રમ્પના નિવેદનના કારણે સંકેતો વધ્યા
આ ઘટનાક્રમ એવા સમયે સામે આવ્યો છે જ્યારે અમેરિકા અને ઈઝરાયેલ વચ્ચે લગભગ ત્રણ અઠવાડિયાથી સંઘર્ષ ચાલી રહ્યો છે અને બંને પક્ષોને ભારે નુકસાન થયું છે. દરમિયાન, ડોનાલ્ડ ટ્રમ્પે પણ એક અણધાર્યું પગલું ભર્યું છે અને હોર્મુઝ સ્ટ્રેટને ખોલવા માટે ઈરાનને આપવામાં આવેલી 48 કલાકની સમયમર્યાદા પછી 5 દિવસ માટે સૈન્ય હુમલા સ્થગિત કરવાની સોમવારે જાહેરાત કરી છે. ટ્રમ્પે કહ્યું કે “કેટલાક ટોચના વ્યક્તિ” સાથે વાતચીત ચાલી રહી છે, જોકે તેમણે સ્પષ્ટ કર્યું કે તે ઈરાનના સર્વોચ્ચ નેતા નથી. તેમણે એવો પણ દાવો કર્યો હતો કે, “વસ્તુઓ ખૂબ સારી રીતે ચાલી રહી છે… અને કરાર 5 દિવસ અથવા તેના કરતા પણ પહેલા થઈ શકે છે.”
