મધ્ય પૂર્વમાં ચાલી રહેલા તણાવ વચ્ચે ઈરાનના ટોચના સૈન્ય કમાન્ડે મંગળવારે એક મોટી જાહેરાત કરી છે. ઈરાની સૈન્યનું કહેવું છે કે જ્યાં સુધી સંપૂર્ણ વિજય પ્રાપ્ત ન થાય ત્યાં સુધી તેની સશસ્ત્ર દળો લડાઈ ચાલુ રાખશે. ખાતમ-અલ-અંબિયા કેન્દ્રીય મુખ્યાલયના પ્રવક્તા મેજર જનરલ અલી અબ્દુલ્લાહી અલિયાબાદીએ જણાવ્યું હતું કે ઈરાનની શક્તિશાળી દળો દેશની અખંડિતતાની રક્ષામાં ગર્વ, વિજયી અને અડગ છે. તેમણે ભારપૂર્વક જણાવ્યું હતું કે જ્યાં સુધી સંપૂર્ણ વિજય પ્રાપ્ત ન થાય ત્યાં સુધી સંઘર્ષ ચાલુ રહેશે.
જનરલ અલિયાબાદીની આ ટિપ્પણી અમેરિકી રાષ્ટ્રપતિ ડોનાલ્ડ ટ્રમ્પની જાહેરાતના સંદર્ભમાં આવી છે, જેમાં તેમણે દાવો કર્યો હતો કે તેહરાન અને વોશિંગ્ટન વચ્ચે વાતચીત ચાલી રહી છે. જોકે, ઈરાને કોઈપણ પ્રકારની સીધી વાતચીતનો ઈન્કાર કર્યો છે. ઈરાનના વિદેશ મંત્રી અબ્બાસ અરાઘચીએ ચોક્કસપણે કહ્યું છે કે તેઓ પ્રાદેશિક દેશોના તેમના સમકક્ષોના સંપર્કમાં છે.
ઈરાનના સરકારી ટેલિવિઝન અનુસાર, જનરલ અલિયાબાદીએ કહ્યું કે અમારી સશસ્ત્ર દળો ઈરાનના સંરક્ષણમાં વિજયી અને સંકલ્પબદ્ધ છે અને સંપૂર્ણ વિજય સુધી આ માર્ગ ચાલુ રાખશે. જો કે આ દરમિયાન તેમણે ‘સંપૂર્ણ વિજય’નો અર્થ શું છે તે સ્પષ્ટ કર્યું નથી, પરંતુ તેને અમેરિકા સાથેની કોઈપણ સંભવિત વાતચીતમાં છૂટ નહીં આપવાની ચેતવણી તરીકે જોવામાં આવી રહી છે.
ટ્રમ્પના દાવા પર વિવાદ ચાલુ છે
બીજી તરફ ટ્રમ્પના મંત્રણા સંબંધિત દાવાઓ પર વિવાદ ચાલુ છે. ઈરાની સંસદના સ્પીકર મોહમ્મદ બાઘર કાલિબાફે સોશિયલ મીડિયા X પર પોસ્ટ કર્યું કે અમેરિકા સાથે કોઈ વાતચીત થઈ નથી. ફાઇનાન્શિયલ અને ઓઇલ માર્કેટમાં હેરાફેરી કરવા માટે ફેક ન્યૂઝનો ઉપયોગ કરવામાં આવી રહ્યો છે. ઈરાનના વિદેશ મંત્રાલયે જણાવ્યું કે અબ્બાસ અરાઘચીએ આ અઠવાડિયે અઝરબૈજાન, ઈજિપ્ત, ઓમાન, પાકિસ્તાન, રશિયા, દક્ષિણ કોરિયા, તુર્કી અને તુર્કમેનિસ્તાનના વિદેશ મંત્રીઓ સાથે યુદ્ધ અંગે ચર્ચા કરી.
