પશ્ચિમ એશિયામાં ચાલી રહેલા યુદ્ધ વચ્ચે ઉત્તર કોરિયાના તાનાશાહ કિમ જોંગ ઉન હવે વૈશ્વિક સ્તરે મિત્ર દેશોની સંખ્યા વધારવામાં વ્યસ્ત છે. રશિયા અને ચીનની નજીક ગણાતા ઉત્તર કોરિયાએ હવે યુરોપિયન દેશ બેલારુસ સાથે મિત્રતા સંધિ પર હસ્તાક્ષર કર્યા છે. આ સંધિનો મુખ્ય ઉદ્દેશ્ય રશિયન રાષ્ટ્રપતિ પુતિનના બે નજીકના સહયોગીઓ વચ્ચેના સંબંધોને વધુ મજબૂત કરવાનો છે.
બેલારુસ સમાચાર એજન્સી બેલ્ટાના અહેવાલ મુજબ, બેલારુસિયન રાષ્ટ્રપતિ લુકાશેન્કોની પ્યોંગયાંગની આ પ્રથમ મુલાકાત છે. ઉત્તર કોરિયાના નેતા કિમ જોંગ ઉને લુકાશેન્કો માટે ભવ્ય સ્વાગત સમારોહનું આયોજન કર્યું હતું. તેમાં સફેદ ઘોડા પર સવાર સૈનિકો, ધ્વજ લહેરાવતા બાળકો અને 21 બંદૂકોની સલામી સામેલ હતી. આ પછી બંને નેતાઓએ મિત્રતા સંધિ પર હસ્તાક્ષર કર્યા અને તેમની મિત્રતાને વધુ ગાઢ બનાવવા સંમત થયા.
બેલારુસની સરકારે આ સંધિને બંને દેશો માટે ખાસ ગણાવી હતી. તે જ સમયે, કિમ જોંગ ઉને ભારપૂર્વક જણાવ્યું હતું કે બંને દેશો ઘણા મુદ્દાઓ પર સમાન વિચાર ધરાવે છે. તેમણે કહ્યું કે, “અમે બેલારુસ પર પશ્ચિમના બિનજરૂરી દબાણનો વિરોધ કરીએ છીએ. તમને જણાવી દઈએ કે, લુકાશેન્કોને રશિયાની નજીક માનવામાં આવે છે. યુક્રેન યુદ્ધ દરમિયાન પણ તેઓ ખુલ્લેઆમ રશિયાનું સમર્થન કરતા જોવા મળ્યા હતા. તેના કારણે અમેરિકા સહિત યુરોપના ઘણા દેશોએ બેલારુસ પર પ્રતિબંધો લગાવ્યા હતા.
નોંધનીય છે કે લુકાશેન્કોની પ્યોંગયાંગની મુલાકાત તેમનું રાજદ્વારી સંતુલન દર્શાવે છે, જેમાં તેઓ રશિયાના મિત્ર અને પશ્ચિમ વિરોધી દેશો સાથે સંબંધોને મજબૂત કરી રહ્યા છે, તો સાથે જ અમેરિકા સાથે સંબંધોને સામાન્ય બનાવવાનો પ્રયાસ કરી રહ્યા છે. તેમની મુલાકાત ગયા અઠવાડિયે અમેરિકી રાષ્ટ્રપતિ ટ્રમ્પના રાજદૂત જોન કોહલ સાથેની બેઠક અને 250 રાજકીય કેદીઓને મુક્ત કર્યા પછી આવી હતી, જેના બદલામાં યુએસએ બેલારુસ પરના પ્રતિબંધોને વધુ હળવા કર્યા હતા.
