મુંબઈ: ભારતીય શેરબજારો આજે એટલે કે 3 એપ્રિલ 2026ના રોજ ગુડ ફ્રાઈડે નિમિત્તે બંધ છે.. બોમ્બે સ્ટોક એક્સચેન્જ (BSE) અને નેશનલ સ્ટોક એક્સચેન્જ (NSE) પર કોઈ ટ્રેડિંગ પ્રવૃત્તિ થશે નહીં. બજારમાં એપ્રિલ મહિનાની આ પહેલી રજા છે અને આ સપ્તાહની બીજી રજા છે. અગાઉ 31 માર્ચે મહાવીર જયંતિના કારણે બજાર પણ બંધ હતું.
સ્ટોક એક્સચેન્જના હોલિડે કેલેન્ડર મુજબ, ઈક્વિટી સેગમેન્ટ, ઈક્વિટી ડેરિવેટિવ્ઝ, કરન્સી ડેરિવેટિવ્ઝ, NDS-RST અને ટ્રાઈ-પાર્ટી રેપો સેગમેન્ટ તેમજ કોમોડિટી ડેરિવેટિવ્ઝ અને ઈલેક્ટ્રોનિક ગોલ્ડ રિસિપ્ટ (EGR) સેગમેન્ટમાં શુક્રવારે ટ્રેડિંગ સંપૂર્ણપણે બંધ રહેશે.
રોકાણકારો માટે રાહતની વાત છે કે હવે સોમવાર એટલે કે 6 એપ્રિલથી બજાર ફરી સામાન્ય રીતે ખુલશે અને તમામ ટ્રેડિંગ એક્ટિવિટી શરૂ થઈ જશે, કારણ કે 4 અને 5 એપ્રિલને શનિવાર અને રવિવાર આવતાં બજારમાં સાપ્તાહિક રજા રહેશે.
વૈશ્વિક સ્તરે પણ ગુડ ફ્રાઈડેના કારણે મુખ્ય બજારોમાં રજા રહેશે. શુક્રવારે અમેરિકા સહિત ઘણા એશિયન અને યુરોપિયન શેરબજારો બંધ રહેશે, જેના કારણે વૈશ્વિક વેપાર પણ પ્રભાવિત થશે. કોમોડિટી માર્કેટની વાત કરીએ તો દેશનું મુખ્ય એક્સચેન્જ મલ્ટી કોમોડિટી એક્સચેન્જ (MCX) પણ આજે સંપૂર્ણપણે બંધ રહેશે. સવાર અને સાંજના બંને સેશનમાં કોઈ ટ્રેડિંગ થશે નહીં, જેના કારણે સોનું, ચાંદી, ક્રૂડ ઓઈલ, કોપર અને અન્ય ધાતુઓમાં કોઈ વેપાર થશે નહીં.
એપ્રિલ મહિનામાં શેરબજારમાં કુલ બે રજાઓ છે. ગુડ ફ્રાઈડે પછીની આગામી રજા 14મી એપ્રિલે ડૉ. ભીમરાવ આંબેડકર જયંતિ નિમિત્તે રહેશે. વર્ષ 2026માં કુલ 20 શેરબજાર રજાઓ શેડ્યૂલ કરવામાં આવી છે, જેમાંથી 4 સપ્તાહના અંતે આવે છે. એટલે કે નિયમિત ટ્રેડિંગ દિવસોમાં કુલ 16 દિવસ બજાર બંધ રહેશે, જેમાંથી અત્યાર સુધીમાં 5 રજાઓ છે. એકંદરે, આજે રોકાણકારો માટે સંપૂર્ણ રજા છે, અને બજારની ગતિવિધિઓ હવે આગલા ટ્રેડિંગ દિવસ એટલે કે સોમવારથી જોવા મળશે.
