નાસિકઃ મહારાષ્ટ્રના નાસિકમાં એક મોટો અકસ્માત થયો છે.. શહેરના શિવાજીનગર વિસ્તારમાં શુક્રવારે રાત્રે લગભગ 10 વાગે રસ્તાની બાજુના કૂવામાં કાર પડતા એક જ પરિવારના નવ લોકોના મોત થયા હતા. આ બનાવથી સમગ્ર ડીંડોરી તાલુકામાં શોકની લાગણી ફેલાઈ ગઈ છે. પોલીસ આ મામલે તપાસ કરી રહી છે.
પ્રાપ્ત માહિતી અનુસાર, શિવાજીનગરના રાજે બેન્ક્વેટ હોલમાં વડજે ક્લાસીસ દ્વારા એક બેઠકનું આયોજન કરવામાં આવ્યું હતું. સભા માટે દરગોડે પરિવાર ઈન્દોર (તા. ડિંડોરી)થી આવ્યો હતો. મીટિંગ પછી દરગોડે પરિવાર તેમની મારુતિ એક્સએલ કારમાં ઘરે પરત ફરી રહ્યો હતો, ત્યારે ડ્રાઈવરે કાબૂ ગુમાવ્યો, જેના કારણે કાર રસ્તાની બાજુમાં પાણીથી ભરેલા કૂવામાં પડી. આ અકસ્માત બાદ ઘટનાસ્થળે લોકોના ટોળેટોળા ઉમટી પડ્યા હતા.
આ અકસ્માતમાં કારમાંથી 8 લોકોના મૃતદેહ બહાર કાઢવામાં આવ્યા હતા, જ્યારે કૂવામાં ડૂબી ગયેલી બાળકીને શોધવા માટે વિશેષ ઓપરેશન હાથ ધરવામાં આવ્યું હતું. બાદમાં તેની લાશ પણ મળી આવી હતી. મૃત્યુ પામેલાઓમાં સુનીલ દત્તાત્રેય દરગોડે (32), રેશ્મા સુનીલ દરગોડે (27), રાખી ઉર્ફે ગુણવંતી (10), માધુરી અનિલ દરગોડે (13), શ્રાવણી અનિલ દરગોડે (11), આશા અનિલ દરગોડે (32), શ્રેયશ અનિલ દરગોડે (11), સૃષ્ટિ દરગોડે (11), સૃષ્ટિ અનિલ દરગોડે (11), રાજેશ અનિલ દરગોડે (14)નો સમાવેશ થાય છે.
એનડીઆરએફની ટીમ પણ ઘટનાસ્થળે પહોંચી હતી. મોડી રાત સુધી બચાવ કાર્ય ચાલુ હતું. ડીંડોરી પોલીસે આ હૃદયદ્રાવક બનાવની નોંધ કરી વધુ તપાસ હાથ ધરી છે.
