અમેરિકાનું આયોવા રાજ્ય સોમવારે (સ્થાનિક સમય) ગોળીબારના અવાજથી હચમચી ગયું હતું. અહીંના એક શહેરમાં અનેક જગ્યાએ ફાયરિંગની ઘટનાઓમાં ઓછામાં ઓછા 7 લોકોના મોત થયા છે. મળતી માહિતી મુજબ, શંકાસ્પદ આરોપીએ પહેલા 6 લોકોની ગોળી મારીને હત્યા કરી અને પછી પોલીસની સામે જ ગોળી મારીને આત્મહત્યા કરી લીધી. પોલીસે જણાવ્યું છે કે પ્રાથમિક તપાસમાં મામલો પારિવારિક વિવાદ હોવાનું જણાય છે.
અહેવાલ મુજબ, આ હૃદયદ્રાવક ઘટના આયોવાના મસ્કાટાઈન શહેરમાં બની હતી. અહીં હુમલાખોર બે ઘર અને એક દુકાનમાં ઘૂસી ગયો અને અંધાધૂંધ ગોળીબાર શરૂ કરી દીધો. મસ્કાટાઈન પોલીસ ચીફ એન્થોની કીસે જણાવ્યું હતું કે પોલીસને રાત્રે 12 વાગ્યાની આસપાસ ગોળીબારનો અહેવાલ મળ્યો હતો. જોકે, પોલીસ ત્યાં પહોંચી ત્યાં સુધીમાં લોકોના મોત થઈ ચૂક્યા હતા. ઘટનાસ્થળેથી ચાર લોકોના મૃતદેહ મળી આવ્યા હતા.
પોલીસ પહોંચે તે પહેલા જ આરોપી સ્થળ પરથી ફરાર થઈ ગયો હતો. પોલીસના જણાવ્યા અનુસાર શંકાસ્પદની ઓળખ 52 વર્ષીય રેયાન વિલિસ મેકફાર્લેન્ડ તરીકે થઈ છે. પોલીસે તેને શોધી કાઢી સર્ચ ઓપરેશન શરૂ કર્યું હતું. જો કે, અધિકારીઓ તેની ધરપકડ કરવા જઈ રહ્યા હતા ત્યારે તેણે પોતાને ગોળી મારી દીધી. “અધિકારીઓ અને ડોકટરોની ટીમે તેને બચાવવાનો પ્રયાસ કર્યો, પરંતુ તે સ્થળ પર જ મૃત્યુ પામ્યો,” પોલીસ ચીફ કીસે કહ્યું.
તપાસ દરમિયાન પોલીસને કેટલીક અન્ય જગ્યાઓ પર પણ ફાયરિંગની માહિતી મળી હતી. આ પછી બીજા ઘર અને નજીકની દુકાનમાંથી વધુ બે લોકોના મૃતદેહ મળી આવ્યા હતા. ગોળી વાગવાથી દરેકના મોત થયા હતા. “પ્રારંભિક તપાસ સૂચવે છે કે આ ગોળીબાર ઘરેલું વિવાદનું પરિણામ હતું. તમામ પીડિતો આરોપીના પરિવારના સભ્યો હોવાનું માનવામાં આવે છે,” મસ્કાટાઇન પોલીસે એક પ્રેસ રિલીઝમાં જણાવ્યું હતું.
