કુવૈતે બુધવારે કહ્યું કે તેણે ઈરાનના ડ્રોન હુમલા બાદ કોમર્શિયલ ફ્લાઈટ્સ સ્થગિત કરી દીધી છે. સંરક્ષણ મંત્રાલયના પ્રવક્તા બ્રિગેડિયર જનરલ સઈદ અબ્દુલ અઝીઝ અલ-ઓતૈબીએ જણાવ્યું હતું કે ‘કેટલાક દુશ્મન ડ્રોન’એ કુવૈત ઈન્ટરનેશનલ એરપોર્ટની પેસેન્જર ઈમારતને નિશાન બનાવ્યું હતું, જેના કારણે ઈમારતને ભારે નુકસાન થયું હતું અને ‘કેટલાક લોકો’ ઘાયલ થયા હતા.
આ ડ્રોન હુમલો એવા સમયે થયો છે જ્યારે ઈરાન અને અમેરિકાએ મંગળવારે મોડી રાત્રે એકબીજા પર મિસાઈલ હુમલા કર્યા હતા. અમેરિકી સેનાએ કહ્યું કે તેણે કુવૈત અને બહેરીન પર છોડેલી ઈરાની મિસાઈલોના જવાબમાં ઈરાની સૈન્ય મથકને નિશાન બનાવ્યું.
હોર્મુઝ પર તણાવ વધ્યો
હોર્મુઝ સ્ટ્રેટમાં અમેરિકા અને ઈરાન વચ્ચે ફરી એકવાર સૈન્ય સંઘર્ષ શરૂ થયો છે. IRGC એટલે કે ઈરાનના ઈસ્લામિક રિવોલ્યુશનરી ગાર્ડ્સ કોર્પ્સે દાવો કર્યો હતો કે ક્શેમ દ્વીપ પર અમેરિકન હુમલાના જવાબમાં તેણે કુવૈત અને બહેરીનમાં અમેરિકન સૈન્ય મથકોને નિશાન બનાવ્યા હતા. ઈરાનના જણાવ્યા અનુસાર યુએસ નેવીના ફિફ્થ ફ્લીટના હેડક્વાર્ટર, મિલિટરી એરબેઝ અને હેલિકોપ્ટર પર મિસાઈલ અને ડ્રોનથી હુમલો કરવામાં આવ્યો હતો. બીજી તરફ અમેરિકાએ કહ્યું છે કે તેણે કુવૈત અને બહેરીન પર ઈરાની મિસાઈલ અને ડ્રોન હુમલાને નિષ્ફળ બનાવ્યા છે.
યુએસ સૈન્યના સેન્ટ્રલ કમાન્ડ (સેન્ટકોમ) એ જણાવ્યું હતું કે કુવૈત પર ફાયર કરવામાં આવેલી બે ઈરાની મિસાઈલો રસ્તામાં પડી કે તૂટી ગઈ હતી, જ્યારે બહેરીનને નિશાન બનાવતી ત્રણ મિસાઈલોને યુએસ અને બહેરીની સંરક્ષણ દળોએ અટકાવી હતી. વધુમાં, કુવૈતમાં અમેરિકી દળોને લક્ષ્ય બનાવતા અસંખ્ય ડ્રોનને કોઈ નુકસાન પહોંચાડ્યા વિના તટસ્થ કરવામાં આવ્યા હતા.
