રશિયાના રાષ્ટ્રપતિ વ્લાદિમીર પુતિને ફરી એકવાર ભારત પ્રત્યે પોતાની મિત્રતા વ્યક્ત કરી છે. આ વખતે તેમણે નવી દિલ્હીની સૌથી મોટી સમસ્યાનો ઉકેલ પણ રજૂ કર્યો છે. વાસ્તવમાં, ભારત પાંચમી પેઢીના ફાઇટર જેટ ખરીદવા પર વિચાર કરી રહ્યું છે, આવી સ્થિતિમાં પુતિને ઓફર કરી છે કે રશિયા પણ ભારત સાથે આ ફાઇટર જેટ બનાવવા માટે તૈયાર છે. તેમણે કહ્યું કે રશિયા તેના સુખોઈ-57 સ્ટીલ્થ ફાઈટર જેટ પ્રોગ્રામમાં ભારતને મદદ કરવા તૈયાર છે.
સેન્ટ પીટર્સબર્ગમાં મીડિયા સાથે વાત કરતા પુતિને સુખોઈના વિકાસ માટે ભારતને આપેલી ઓફર વિશે પણ વાત કરી. તેમણે કહ્યું, “જ્યાં સુધી સુખોઈ-57નો સંબંધ છે, એક સમયે અમે અમારા ભારતીય મિત્રો સાથે આ ટેક્નોલોજી પર સાથે કામ કરવાની ઓફર કરી હતી. પરંતુ તે સમયે અમારા ભારતીય મિત્રોએ કહ્યું હતું કે તમે પહેલા આગળ વધો અને પછી જોઈશું. કદાચ અમે પણ તેમાં જોડાઈ શકીએ.”
સુખોઈ SU-57 હાલમાં વિશ્વનું શ્રેષ્ઠ ફાઈટર જેટ છેઃ પુતિન
પુતિને રશિયાના સૌથી અદ્યતન ફાઈટર જેટની પ્રશંસા કરી હતી અને તેને વિશ્વનું શ્રેષ્ઠ ફાઈટર પ્લેન ગણાવ્યું હતું. તેમણે કહ્યું, “આ પાંચમી પેઢીનું એરક્રાફ્ટ છે અને હું માનું છું કે તે અત્યારે વિશ્વનું સર્વશ્રેષ્ઠ છે. અમે તેને સ્વતંત્ર રીતે વિકસાવ્યું છે, પરંતુ અમે આ ક્ષેત્રમાં ભારત સાથે મળીને કામ કરવા તૈયાર છીએ. ભારતને એરક્રાફ્ટ આપવાનું હોય કે તેના વધુ વિકાસ પર કામ કરવું હોય. અમને તેમાં કોઈ સમસ્યા નથી, તેના પર કોઈ પ્રતિબંધ નથી. આ જ વાત અમારી હવાઈ સંરક્ષણ પ્રણાલી પર પણ લાગુ પડે છે.”
