ભૂટાનમાં રવિવારે રાત્રે ભૂકંપના જોરદાર આંચકા અનુભવાયા હતા. જર્મન રિસર્ચ સેન્ટર ફોર જીઓસાયન્સિસ (GFZ) અનુસાર, ભૂકંપની તીવ્રતા 5.6 હતી. ભૂકંપની ઊંડાઈ 10 કિલોમીટર હોવાનું કહેવાય છે. રોયટર્સ દ્વારા આ માહિતી આપવામાં આવી છે.
ભૂકંપનું કેન્દ્ર ભૂટાનના પુનાખામાં હતું, જે પશ્ચિમ બંગાળની ઉત્તરે છે. ઉત્તર બંગાળ, પૂર્વોત્તરના ભાગો અને બાંગ્લાદેશમાં પણ ભૂકંપના આંચકા અનુભવાયા હતા. ઘણા ઈન્ટરનેટ યુઝર્સે સોશિયલ મીડિયા પર આ વિસ્તારમાં ભૂકંપની માહિતી શેર કરી છે. હાલમાં કોઈ નુકસાન કે જાનહાનિના કોઈ તાત્કાલિક અહેવાલ નથી.
લોકો ઘરની બહાર નીકળી ગયા
ગંગટોક અને સિક્કિમના અન્ય વિસ્તારોના રહેવાસીઓએ જણાવ્યું હતું કે થોડીક સેકન્ડો માટે આંચકા અનુભવ્યા બાદ ઘણા લોકો સાવચેતીના ભાગરૂપે ઘરની બહાર આવી ગયા હતા. સિક્કિમ સ્ટેટ ડિઝાસ્ટર મેનેજમેન્ટ ઓથોરિટીના એક અધિકારીએ જણાવ્યું કે પરિસ્થિતિ પર નજર રાખવામાં આવી રહી છે.
પશ્ચિમ બંગાળના સિલીગુડી શહેરના કેટલાક વિસ્તારોમાં તેમજ કૂચ બિહાર, જલપાઈગુડી અને અલીપુરદ્વાર જિલ્લામાં પણ લોકોએ ભૂકંપના આંચકા અનુભવ્યા અને તેઓ ઘરની બહાર આવી ગયા. ભૂતાનને અડીને આવેલા ઉત્તર બંગાળના આ વિસ્તારોમાં કોઈને ઈજા કે સંપત્તિને નુકસાન થવાના સમાચાર નથી.
