યુરોપિયન દેશોમાં ટૂંક સમયમાં અઝાન પર પ્રતિબંધ મૂકવાની તૈયારીઓ ચાલી રહી છે. આ દેશ ડેનમાર્ક છે. અહીની સરકારે ‘ઈસ્લામાઈઝેશન’ને ટાંકીને છેલ્લા કેટલાક દિવસોમાં આવા ઘણા પગલાઓ લાગુ કર્યા છે. હવે અઝાન પર પ્રતિબંધની ચર્ચા આખી દુનિયામાં હેડલાઇન્સમાં છે. આ મામલે દેશના ઈમિગ્રેશન મંત્રીનું કડક વલણ પણ ચર્ચામાં આવ્યું છે.
ઈમિગ્રેશન મિનિસ્ટર મોર્ટન બોડસ્કોવે તાજેતરમાં જ એક નિવેદનમાં કહ્યું છે કે ડેનમાર્કને ઈસ્લામાબાદનો હિસ્સો બનવા દેવામાં આવશે નહીં. ડેઈલી મેલના અહેવાલ અનુસાર, સોશિયલ ડેમોક્રેટ્સ પાર્ટીના ડાબેરી નેતા બોડસ્કોવે ડેનિશ ન્યૂઝ એજન્સી રિટ્ઝાઉ સાથે વાત કરતા સરકારની નવી યોજના વિશે જણાવ્યું.
મંત્રી બોડસ્કોવે કહ્યું કે ડેનમાર્કમાં ‘ઈસ્લામીકરણ’ ઝડપથી થઈ રહ્યું છે અને તે જાહેર સ્થળો પર પણ દેખાઈ રહ્યું છે, જેને હવે સહન કરી શકાય નહીં. તેણે કહ્યું, “ડેનમાર્કની છત પર અઝાનનો અવાજ સંભળાવો જોઈએ નહીં. ડેનમાર્કમાં તેની કોઈ જગ્યા નથી. જ્યારે તમે ડેનમાર્કની સડકો પર ચાલો ત્યારે તમારા મનમાં કોઈ શંકા ન હોવી જોઈએ કે તમે ઈસ્લામાબાદ આવ્યા છો.”
અગાઉ પણ પ્રતિબંધો લાદવામાં આવ્યા છે
અગાઉ, ડેનિશ વડા પ્રધાન મેટ્ટે ફ્રેડરિકસેન આ વર્ષે માર્ચમાં યોજાયેલી ચૂંટણીઓ પછી ત્રીજી વખત સત્તામાં પાછા ફર્યા છે. તેમની સરકાર સમગ્ર યુરોપમાં ગેરકાયદેસર ઇમિગ્રન્ટ્સ અંગેની કડક નીતિઓ અપનાવવા માટે જાણીતી છે. ડેનિશ સરકારે આ વર્ષે જાહેર સ્થળોએ ચહેરો સંપૂર્ણપણે ઢાંકતા બુરખા પર પ્રતિબંધ મૂકતો કાયદો પસાર કર્યો હતો. તે જ સમયે, સરકારે દેશની તમામ શૈક્ષણિક સંસ્થાઓને ત્યાં બનેલા ‘પ્રાર્થના રૂમ’ને તાત્કાલિક દૂર કરવાનો આદેશ આપ્યો છે.
