અનુભવી બેટ્સમેન વિરાટ કોહલી ODI ક્રિકેટમાં બીજા સૌથી વધુ રન બનાવનાર ખેલાડી બનવાથી માત્ર 54 રન દૂર છે. હાલમાં કોહલીના નામે વનડેમાં 14181 રન છે અને તે શ્રીલંકાના કુમાર સંગાકારા (14234)થી પાછળ છે. ઓસ્ટ્રેલિયા સામેની વનડે શ્રેણીમાં વિરાટ આ સિદ્ધિ હાંસલ કરી શકે છે. ભારતીય ક્રિકેટના વર્તમાન બે સૌથી મોટા બેટ્સમેન રોહિત શર્મા અને વિરાટ કોહલીની વાપસી પર સમગ્ર ક્રિકેટ જગતની નજર રહેશે. આ બંને લગભગ સાત મહિનાના લાંબા અંતર બાદ આંતરરાષ્ટ્રીય ક્રિકેટમાં વાપસી કરી રહ્યા છે. બંને ખેલાડીઓ હવે માત્ર ODI ક્રિકેટમાં ભારત માટે રમે છે. આવી સ્થિતિમાં તેના ચાહકોએ તેને રમતા જોવા માટે લાંબી રાહ જોવી પડી છે.
ODIમાં સૌથી વધુ રન બનાવવાનો રેકોર્ડ મહાન ભારતીય ક્રિકેટર સચિન તેંડુલકરના નામે છે. સચિને 463 મેચમાં 18426 રન બનાવ્યા છે. સચિન ODI ક્રિકેટમાં બેવડી સદી ફટકારનાર પ્રથમ બેટ્સમેન છે. આ યાદીમાં વિરાટ કોહલી ત્રીજા નંબર પર છે. તેણે 302 મેચમાં 14,181 રન બનાવ્યા છે.
સિરીઝ પહેલા કેપ્ટનશિપમાં થયેલા ફેરફારથી એ પણ દેખાઈ રહ્યું છે કે હવે ભારતીય ટીમ આગળ જોઈ રહી છે. આ બંને ખેલાડીઓના ભવિષ્યને લઈને સતત અટકળો ચાલી રહી છે, ત્યારે ટીમ મેનેજમેન્ટ આ પ્રવાસમાં તેમના પ્રદર્શન પર ખૂબ નજીકથી નજર રાખશે. બંને ખેલાડીઓ આ શ્રેણીમાં પોતાનું સર્વશ્રેષ્ઠ પ્રદર્શન કરવાનો પ્રયાસ કરશે.
રોહિત 500 આંતરરાષ્ટ્રીય મેચ રમનાર વિશ્વનો 11મો અને ભારત તરફથી પાંચમો ક્રિકેટર બનશે. રોહિતના નામે અત્યાર સુધી 499 આંતરરાષ્ટ્રીય મેચ છે. આ સિવાય રોહિત ઓસ્ટ્રેલિયામાં જ ઓસ્ટ્રેલિયા સામે 1000 ODI રન પૂરા કરવાથી માત્ર 10 રન દૂર છે. આવું કરનાર તે પ્રથમ ભારતીય હશે.
