નોઈડામાં રહેતી એક મહિલા ડોક્ટરે દહેજ ઉત્પીડન, ઘરેલુ હિંસા અને અન્ય અપરાધોના આરોપમાં તેના IPS ઓફિસર પતિ અને સાસરિયાઓ સહિત 6 લોકો વિરુદ્ધ FIR નોંધાવી છે. પોલીસે શનિવારે જણાવ્યું કે ફરિયાદના આધારે આ મામલે તપાસ શરૂ કરવામાં આવી છે.
અધિકારીઓના જણાવ્યા અનુસાર, નોઈડાના સેક્ટર 128માં રહેતી ડૉ. કૃતિ સિંહે તેના પતિ શિવાંશુ રાજપૂત સહિત તેના પિતા, માતા, ભાઈ, ભાભી અને બે મિત્રો વિરુદ્ધ ફરિયાદ નોંધાવી છે. શિવાંશુ રાજપૂત 2019 બેચના કર્ણાટક કેડરના IPS અધિકારી છે અને બેંગલુરુમાં પોસ્ટેડ છે.
નોઈડા સેક્ટર 126 પોલીસ સ્ટેશનના એસએચઓ ભૂપેન્દ્ર કુમારે જણાવ્યું હતું કે, “ભારતીય ન્યાય સંહિતા, 2023ની કલમ 85, 115(2), 352, 351(2), 3(5) અને 316(2) તેમજ દહેજ પ્રતિબંધ અધિનિયમ, 1961ની કલમ 3 અને 4 હેઠળ એફઆઈઆર નોંધવામાં આવી છે.”
ડૉ. કૃતિ સિંહે 16 ઑક્ટોબરે નોંધાવેલી તેમની 41 પાનાની ફરિયાદમાં જણાવ્યું છે કે તેમના લગ્ન ડિસેમ્બર 2021માં આગ્રાની એક ફાઇવ સ્ટાર હોટલમાં થયા હતા. તેમણે આરોપ લગાવ્યો હતો કે તેમના લગ્ન થયા ત્યારથી જ તેઓ દહેજની માગણી અને શારીરિક અને માનસિક ઉત્પીડનનો સામનો કરી રહી છે. દંપતીને દોઢ વર્ષનો પુત્ર પણ છે.
