ઓડિશાના ઢેંકનાલ જિલ્લામાં એક પિતાએ પોતાની દીકરી પર બળાત્કારનો પ્રયાસ કરનાર વ્યક્તિની હત્યા કરી નાખી. વરિષ્ઠ પોલીસ અધિકારીએ આ માહિતી આપી. આ ઘટના શનિવારે પરજાંગ પોલીસ સ્ટેશન વિસ્તારના એક ગામ પાસે બની હતી. છોકરીની ઉંમર 10 વર્ષની છે. પોલીસના જણાવ્યા અનુસાર બાળકી તેના પિતા સાથે કેનાલમાં ન્હાવા ગઈ હતી. સ્નાન કર્યા બાદ બાળકી શૌચ કરવા માટે થોડે દૂર ગઈ હતી.
રિપોર્ટ અનુસાર, તે જ સમયે 27 વર્ષના યુવકે યુવતી પર હુમલો કર્યો. બાળકીની ચીસો સાંભળીને તેના પિતા સ્થળ પર પહોંચ્યા અને નજીકમાં પડેલા પથ્થર વડે હુમલાખોર પર હુમલો કર્યો, જેમાં તેનું ઘટનાસ્થળે જ મોત થયું. પોલીસે જણાવ્યું કે આ પછી પિતાએ પરજાંગ પોલીસ સ્ટેશનમાં સરેન્ડર કર્યું. મામલાની તપાસ ચાલુ છે.
સગીર પુત્રી પર બળાત્કાર કરનાર દોષિતને સજા
બીજી તરફ, મહારાષ્ટ્રના થાણે જિલ્લાની અદાલતે એક વ્યક્તિને તેની સગીર પુત્રી પર વારંવાર બળાત્કાર કરવા અને તેને ગર્ભવતી બનાવવા બદલ 20 વર્ષની સખત કેદની સજા ફટકારી છે. કોર્ટે 16 ઓક્ટોબરે આ આદેશ આપ્યો હતો, જેની નકલ રવિવારે ઉપલબ્ધ કરાવવામાં આવી હતી. ન્યાયાધીશે આરોપીને 20 વર્ષની સખત કેદની સજા અને 50,000 રૂપિયાનો દંડ ફટકાર્યો છે. વિશેષ સરકારી વકીલ રેખા હિવરાલેએ જણાવ્યું હતું કે પીડિતા સહિત ફરિયાદ પક્ષના 13 સાક્ષીઓએ કોર્ટ સમક્ષ જુબાની આપી હતી. ઓક્ટોબર 2021 માં નોંધાયેલા કેસની વિગતો અનુસાર, દારૂના નશામાં આરોપી, 15 વર્ષની પુત્રીનું વારંવાર યૌન શોષણ કરતો હતો અને તેણીને છરી વડે ધમકી આપતો હતો.
