ઓસ્ટ્રેલિયાના દિગ્ગજ ખેલાડી રિકી પોન્ટિંગે યુવા કેપ્ટન શુભમન ગિલના વખાણ કર્યા છે. પોન્ટિંગે કહ્યું છે કે ગિલમાં ‘બુલડોગ’ જેવી લડાઈની ભાવના છે અને તે ત્યારે જ બહાર આવે છે જ્યારે ટીમને તેની સૌથી વધુ જરૂર હોય. ગિલ IPLમાં ગુજરાત ટાઇટન્સની કપ્તાની કરી રહ્યો છે અને હવે તે બે ફોર્મેટમાં ભારતની કેપ્ટનશીપ સંભાળી રહ્યો છે. શુભમન ગિલને આ વર્ષે ઈંગ્લેન્ડ સામેની ટેસ્ટ શ્રેણી પહેલા ટેસ્ટ ટીમનો કેપ્ટન બનાવવામાં આવ્યો છે, જ્યારે ઓસ્ટ્રેલિયા સામેની વનડે શ્રેણી પહેલા તેને રોહિતની જગ્યાએ ટીમનો કેપ્ટન બનાવવામાં આવ્યો છે. ગિલે ઈંગ્લેન્ડ ટેસ્ટ શ્રેણીમાં પાંચ મેચમાં 754 રન બનાવ્યા હતા. તેની કપ્તાનીમાં શ્રેણી 2-2થી ડ્રો રહી હતી. તેણે આ પ્રવાસમાં ચાર સદી ફટકારી હતી.
શુભમન ગિલને ODI ટીમના કેપ્ટન તરીકે પસંદ કરવામાં આવ્યા છે. તેણે રોહિત શર્માની જગ્યાએ આ જવાબદારી લીધી છે. જો કે, ટેસ્ટ શ્રેણીથી વિપરીત, ODIમાં તેની કેપ્ટનશિપ હેઠળ ટીમની શરૂઆત ખરાબ રહી હતી. ઓસ્ટ્રેલિયાએ ભારતીય ટીમને પહેલી જ ODIમાં હરાવ્યું હતું. જોકે, ભૂતપૂર્વ ઓસ્ટ્રેલિયન ક્રિકેટર રિકી પોન્ટિંગ સુકાની તરીકે શુભમન ગિલથી ખૂબ જ પ્રભાવિત થયા છે. ICC સમીક્ષા પર બોલતા પોન્ટિંગે શુભમન ગિલની કેપ્ટનશિપ અને તાજેતરના ઈંગ્લેન્ડ પ્રવાસમાં તેના પ્રદર્શનની પ્રશંસા કરી હતી.
રિકી પોન્ટિંગે કહ્યું, “મને ખરેખર ગમ્યું કે તેણે યુકેમાં તે મજબૂત ઇંગ્લિશ ટીમ સામે કેવી રીતે ટીમનું નેતૃત્વ કર્યું. કેટલીક ક્ષણો એવી હતી જ્યારે તે કદાચ તેના સામાન્ય વર્તનથી થોડો દૂર હતો. તેણે પોતાની છાપ બનાવવા અને ટીમ માટે મજબૂત ઊભા રહેવા માટે જે કરવું હતું તે બધું કર્યું.”
તેણે ઉમેર્યું: “તેણે કરેલી નાની વસ્તુઓ, જેમ કે માન્ચેસ્ટરમાં મેદાનની બહાર ન આવવું, મને લાગે છે કે તેણે મજબૂત છાપ છોડી દીધી. તેણે ઝડપથી ટીમને સંભાળી અને બેટ વડે ઉદાહરણ તરીકે નેતૃત્વ કર્યું. તે સામાન્ય રીતે મેદાન પર ખૂબ જ શાંત સ્વભાવનો હોય છે. પરંતુ તે વાસ્તવિક લડાઈ, બુલડોગ ભાવના ત્યારે બહાર આવી જ્યારે તેની ટીમને તેની સૌથી વધુ જરૂર હતી.”
