અમેરિકન અબજોપતિ એલોન મસ્કની સેટેલાઈટ ઈન્ટરનેટ કંપની સ્ટારલિંક ભારતમાં તેના પ્રવેશ માટેની તૈયારીના મહત્વના તબક્કામાં પહોંચી ગઈ છે. કંપની 30 અને 31 ઓક્ટોબરે મુંબઈમાં સુરક્ષા અને ટેકનિકલ ડેમો ચલાવવા જઈ રહી છે. આ ડેમો ભારતમાં સેટેલાઇટ બ્રોડબેન્ડ સેવાઓ શરૂ કરતા પહેલા ફરજિયાત પ્રક્રિયાનો એક ભાગ છે.
સૂત્રોના જણાવ્યા અનુસાર, સ્ટારલિંકને ભારતમાં કામચલાઉ સ્પેક્ટ્રમ ફાળવવામાં આવ્યું છે અને આ ડેમો આ ફ્રીક્વન્સીઝ પર કરવામાં આવશે. કંપની આ પરીક્ષણો દ્વારા બતાવશે કે તેનું નેટવર્ક GMPCS (Global Mobile Personal Communication by Satellite) લાયસન્સ સંબંધિત તમામ તકનીકી અને સુરક્ષા શરતોને પૂર્ણ કરે છે.
કાયદાકીય એજન્સીઓ સામે ડેમો યોજાશે
પ્રથમ ડેમો કાયદા અમલીકરણ એજન્સીઓની હાજરીમાં યોજાશે, જેથી સરકાર ખાતરી કરી શકે કે સ્ટારલિંકની સેટેલાઇટ કનેક્ટિવિટી ભારતીય સુરક્ષા ધોરણો અને ડેટા સુરક્ષા નીતિઓનું પાલન કરે છે. તમને જણાવી દઈએ કે, ભારતમાં સ્ટારલિંકની લોન્ચિંગ પ્રક્રિયા છેલ્લા કેટલાક મહિનાઓથી ચર્ચામાં છે. કંપનીએ દેશમાં વ્યાપારી કામગીરી શરૂ કરતા પહેલા અનેક મંજૂરીઓ મેળવવાની હોય છે, જેમાં સુરક્ષા, ટેકનોલોજી અને સ્પેક્ટ્રમના ઉપયોગને લગતી પરવાનગીઓનો સમાવેશ થાય છે.
કંપનીના સફળ ડેમો રન પછી, સ્ટારલિંક માટે ભારતમાં તેની સેટેલાઇટ બ્રોડબેન્ડ સેવાઓ શરૂ કરવાનો માર્ગ સાફ થઈ શકે છે. સ્ટારલિંકનો ઉદ્દેશ્ય દૂરસ્થ અને ગ્રામીણ વિસ્તારોમાં જ્યાં પરંપરાગત ફાઈબર અથવા મોબાઈલ નેટવર્ક મર્યાદિત છે ત્યાં હાઈ-સ્પીડ ઈન્ટરનેટ પહોંચાડવાનો છે.
