ભારતીય મહિલા ટીમે સેમિફાઇનલમાં ડિફેન્ડિંગ ચેમ્પિયન ઓસ્ટ્રેલિયાને હરાવીને રોકી હતી. પ્રથમ બેટિંગ કરતા ઓસ્ટ્રેલિયાએ 49.5 ઓવરમાં 338 રન બનાવ્યા હતા. જવાબમાં ભારત માટે જેમિમાએ સદી ફટકારી અને કેપ્ટન હરમનપ્રીત સાથે ત્રીજી વિકેટ માટે 167 રનની ભાગીદારી કરી, જેના કારણે ભારતે 48.3 ઓવરમાં પાંચ વિકેટે 341 રન બનાવીને મેચ જીતી લીધી. ઓસ્ટ્રેલિયન ટીમ આ ટૂર્નામેન્ટમાં અજેય રહી હતી, પરંતુ ભારતીય ટીમે એલિસ હીલીની ટીમના વિજેતા અભિયાનને રોકી દીધું હતું. ભારત હવે રવિવારે ફાઇનલમાં દક્ષિણ આફ્રિકા સામે ટકરાશે, જેણે અન્ય સેમિફાઇનલમાં ઇંગ્લેન્ડને હરાવ્યું હતું.
ઓસ્ટ્રેલિયા સામેની સેમીફાઈનલમાં ભારતને જીત અપાવ્યા બાદ જેમિમા ભાવુક થઈ ગઈ હતી અને પોતાના આંસુને કાબૂમાં રાખી શકી નહોતી. સેમિફાઇનલમાં સદી ફટકારીને જેમિમા અણનમ રહી હતી અને તેને પ્લેયર ઓફ ધ મેચ જાહેર કરવામાં આવી હતી. જેમિમા 134 બોલમાં 14 ચોગ્ગાની મદદથી 127 રન બનાવ્યા બાદ અણનમ રહી હતી. જેમિમા અને હરમનપ્રીત વચ્ચે ત્રીજી વિકેટ માટે 167 રનની ભાગીદારી થઈ હતી.
ભારતીય મહિલા ટીમે ઓસ્ટ્રેલિયાને એવી હાર આપી છે કે આ ટીમ લાંબા સમય સુધી યાદ રાખશે. ભારતીય મહિલા ટીમના સભ્યો પણ જાણે છે કે તેમણે કેટલી મોટી જીત નોંધાવી છે. ભારતે ઓસ્ટ્રેલિયાને હરાવતા જ ટીમના સભ્યો આનંદથી ઉછળી પડ્યા હતા. બધા એકબીજાને ગળે લગાડવા લાગ્યા. આ દરમિયાન ઘણા ખેલાડીઓની આંખોમાં આંસુ આવી ગયા. ભારત હજુ વર્લ્ડકપ ટાઈટલથી એક ડગલું દૂર છે, પરંતુ સેમીફાઈનલમાં મળેલી આ અભૂતપૂર્વ જીતને કારણે ટીમના ખેલાડીઓ પોતાની ભાવનાઓ પર કાબૂ રાખી શક્યા નથી.
ભારતીય મહિલા ટીમની બે દિગ્ગજ ખેલાડીઓ હરમનપ્રીત અને સ્મૃતિ મંધાના પણ જીત બાદ ભાવુક થઈ ગઈ હતી. આ જીત આ બંને ખેલાડીઓ માટે ખૂબ જ મહત્વની છે અને સેમીફાઈનલમાં જીત બાદ બંને જે રીતે એકબીજાને મળ્યા હતા તેનાથી આ વાત સાબિત થઈ હતી.
ડ્રેસિંગ રૂમમાં ઉજવણી
ભારતની જીત બાદ ડ્રેસિંગ રૂમમાં પણ જોરદાર ઉજવણી કરવામાં આવી હતી. જેમિમા ડ્રેસિંગ રૂમમાં પહોંચી કે તરત જ તેના સાથી ખેલાડીઓએ તેના માટે જોરથી ચીયર કરી. તમામ ખેલાડીઓએ જેમિમાને ગળે લગાવી અને ઐતિહાસિક ઇનિંગ માટે અભિનંદન પણ આપ્યા. ભારતીય ક્રિકેટ કંટ્રોલ બોર્ડ (BCCI) એ એક વીડિયો શેર કર્યો છે જેમાં મહિલા ટીમના સભ્યો ફાઇનલમાં પહોંચવાની ઉજવણી કરી રહ્યાં છે. આ દરમિયાન ખેલાડીઓએ એકબીજા સાથે સેલ્ફી પણ લીધી હતી.
