કેનેડાની સંસદમાં એક બિલ રજૂ કરવામાં આવ્યું છે, જેને લઈને ભારતીય ડાયસ્પોરા ચિંતિત છે. આ બિલમાં એવો પ્રસ્તાવ મૂકવામાં આવ્યો છે કે કેનેડિયન સત્તાવાળાઓને કોઈપણ સમયે કામચલાઉ વિઝા પર ભારતીય ઈમિગ્રન્ટ્સને બહાર નીકળવાનો આદેશ આપવાની સત્તા આપવામાં આવે. આ અંતર્ગત સત્તાવાળાઓને કોઈપણ સમયે ટેમ્પરરી વિઝા કેન્સલ કરવાનો કે બિલકુલ ઈશ્યુ ન કરવાનો અધિકાર હશે. સીબીસી ન્યૂઝના અહેવાલ મુજબ, આ નિર્ણય બાંગ્લાદેશ અને ભારતના નાગરિકોને લઈને લેવામાં આવી રહ્યો છે. આ અંતર્ગત કેનેડા અમેરિકન પ્રશાસનની મદદ પણ લેશે. આ બિલ મહત્વપૂર્ણ છે કારણ કે તે એવા સમયે રજૂ કરવામાં આવ્યું છે જ્યારે કેનેડાએ ભારતીય વિદ્યાર્થીઓ દ્વારા કરવામાં આવેલી 74 ટકા વિઝા અરજીઓ નકારી કાઢી છે.
જસ્ટિન ટ્રુડોના સમયથી ભારત અને કેનેડા વચ્ચેના સંબંધોમાં ખટાશ આવી રહી છે. આવી સ્થિતિમાં કેનેડા તરફથી વિઝા નિયમોમાં કડકાઈ ભારત સામે જોવા મળી રહી છે. કેનેડાના ઈમિગ્રેશન મિનિસ્ટર દ્વારા કરાયેલા પ્રસ્તાવ મુજબ કેનેડાના ઈમિગ્રેશન રેફ્યુજી એન્ડ સિટીઝનશિપ ડિપાર્ટમેન્ટ, કેનેડા બોર્ડર સર્વિસ એજન્સી અને અમેરિકન ઓથોરિટી સાથે મળીને કામ કરશે. આ અંતર્ગત સત્તાવાળાઓને કોઈપણ સમયે વિઝા કેન્સલ કરવાની કે બિલકુલ ઈશ્યુ ન કરવાની સત્તા આપવામાં આવશે. જોકે, આ બિલને લઈને વિવાદ થયો છે અને કેનેડામાં જ દેખાવો પણ શરૂ થઈ ગયા છે. બિલમાં કહેવામાં આવ્યું છે કે મહામારી કે યુદ્ધ જેવા સંજોગોમાં મોટા પાયે આવા વિઝા રદ કરવાનો અધિકાર હશે.
કેનેડામાં જ આ પ્રસ્તાવનો વિરોધ થયો હતો, 300 સંસ્થાઓએ નારાજગી વ્યક્ત કરી હતી
કેનેડાના ઈમિગ્રેશન મિનિસ્ટર લેના ડાયબનું કહેવું છે કે અમારી સરકાર કોઈ દેશ વિરુદ્ધ આ નિર્ણય લઈ રહી નથી. અમારો પ્રસ્તાવ છે કે મહામારી કે યુદ્ધ જેવી પરિસ્થિતિમાં નિર્ણય લઈ શકાય. આ બિલ સંસદમાં મૂકવામાં આવ્યું છે અને પીએમ માર્ક કાર્નીની સરકાર તેને પસાર કરાવવાનો પ્રયાસ કરી રહી છે. કેનેડામાં 300 નાગરિક સમાજ જૂથોએ આ બિલ અંગે ચિંતા વ્યક્ત કરી છે. તેમનું કહેવું છે કે આનાથી સરકારને મોટા પાયે દેશમાંથી લોકોને બહાર કાઢવાની શક્તિ મળશે. સરકારી સૂત્રોનું કહેવું છે કે આવો પ્રસ્તાવ એટલા માટે કરવામાં આવી રહ્યો છે કે જેથી પેન્ડિંગ વિઝા અરજીઓને મોટા પાયે રિજેક્ટ કરી શકાય.
કેનેડા જવા માટે અરજી કરનારા ભારતીયોમાં 4 ગણો વધારો
બીજી મહત્વની વાત એ છે કે ભારતમાંથી વિઝા અરજીઓમાં ઘણો વધારો થયો છે. મે 2023માં કેનેડા જવા માટે 500 અરજીઓ આવી હતી, જ્યારે જુલાઈ 2024માં આ આંકડો વધીને 2000 થયો હતો. કેનેડિયન પ્રશાસન આટલી મોટી સંખ્યામાં માઈગ્રન્ટ્સના આગમનને લઈને ચિંતિત છે અને આ કારણોસર વિઝા નિયમો કડક કરવાની તૈયારીઓ થઈ રહી છે. મોટી સંખ્યામાં વિઝા અરજીઓ આવી રહી હોવાને કારણે પ્રોસેસિંગનો સમય પણ વધી ગયો છે.
