હોંગકોંગમાં બુધવારે કેટલીક ગગનચુંબી ઇમારતોમાં ભીષણ આગ ફાટી નીકળી હતી, જેમાં ઘણા લોકોના મોત થયા હતા. તાઈ પો જિલ્લાના વાંગ ચુક કોર્ટ નામના હાઉસિંગ કોમ્પ્લેક્સમાં લાગેલી આગમાં મૃત્યુઆંક 44 પર પહોંચી ગયો છે. આ સિવાય 279 લોકો હજુ પણ ગુમ છે, જ્યારે ઘણા ગંભીર હાલતમાં હોસ્પિટલમાં દાખલ છે. સ્થાનિક મીડિયાના અહેવાલો અનુસાર, આ ઘટના માટે જવાબદાર ત્રણ લોકોની ધરપકડ કરવામાં આવી છે. આ ઘટનાની નોંધ લેતા ચીનના રાષ્ટ્રપતિ શી જિનપિંગે પણ મૃતકો અને તેમના પરિવારજનો પ્રત્યે સંવેદના વ્યક્ત કરી છે અને બચાવ કાર્યમાં ઝડપ લાવવાનો આદેશ આપ્યો છે.
રોઈટર્સના અહેવાલ મુજબ હોંગકોંગના મુખ્ય કાર્યકારી અધિકારી જોન લીએ જણાવ્યું કે જે ઈમારતોમાં આગ લાગી તે 1980ના દાયકામાં બનાવવામાં આવી હતી. 2000 ફ્લેટ ધરાવતી આ ઈમારતોમાં વૃદ્ધો સહિત લગભગ 4000 લોકો રહેતા હતા. છેલ્લા કેટલાક સમયથી અહીં રિનોવેશનનું કામ ચાલી રહ્યું હતું, જેના કારણે તમામ ઈમારતોને ઓઈલ પેઈન્ટ અને વાંસના પાલખથી ઢાંકી દેવામાં આવી હતી. જેના કારણે આગ વધુ ઝડપથી ફેલાઈ હતી. થોડી જ વારમાં આગએ 7 ઈમારતોને લપેટમાં લીધી હતી.
ઘટનાની જાણ થતાં જ ફાયર બ્રિગેડની ટીમ ત્યાં પહોંચી ગઈ હતી, પરંતુ ત્યાં સુધીમાં આગમાં ઘણા લોકો બળીને રાખ થઈ ગયા હતા. મોડી રાત સુધી ભારે જહેમત બાદ આગ પર કાબુ મેળવ્યો હતો. હાલમાં, 700 થી વધુ લોકોને અસ્થાયી આશ્રયસ્થાનોમાં ખસેડવામાં આવ્યા છે. આ ઉપરાંત આગ લાગવાનું કારણ જાણવા માટે પોલીસ અને ફાયર બ્રિગેડની ટીમોએ એક ટીમ બનાવી છે.
લીએ જણાવ્યું હતું કે આ ઘટના બાદ પોલીસે બિલ્ડીંગનું નિર્માણ કરનાર અને નવીનીકરણની દેખરેખ રાખનાર કંપનીના બે ડિરેક્ટરો અને એક એન્જિનિયરની ધરપકડ કરી છે. તેની સામે સામૂહિક હત્યાનો કેસ નોંધવામાં આવ્યો છે.
