રશિયા યુક્રેન યુદ્ધ: રશિયા સાથેના કરાર માટે અમેરિકાના વધતા દબાણ વચ્ચે, યુક્રેનના રાષ્ટ્રપતિ વોલોડીમિર ઝેલેન્સકીએ કોઈપણ પ્રદેશ છોડવાનો સ્પષ્ટ ઇનકાર કર્યો છે. યુક્રેન માટે યુરોપિયન સમર્થન મેળવવાનો પ્રયાસ કરી રહેલા ઝેલેન્સકીએ ગુરુવારે કહ્યું કે યુક્રેન આ યુદ્ધ લડી રહ્યું છે કારણ કે તે રશિયાને તેની કોઈપણ સંપત્તિ આપવા માંગતું નથી. દરમિયાન, ઝેલેન્સકીએ ગુરુવારે લગભગ 30 દેશોના નેતાઓ અને અધિકારીઓ સાથે તાત્કાલિક બેઠક બોલાવી છે.
આ બેઠકમાં જર્મની, બ્રિટન અને ફ્રાન્સ સહિત યુક્રેનના કેટલાય સહયોગીઓ ભાગ લે તેવી અપેક્ષા છે. ઘણા દેશો વીડિયો લિંક દ્વારા બેઠકમાં ભાગ લેવા માટે પણ સહમત થયા છે. આ બેઠકને ‘કોલિશન ઓફ ધ વિલિંગ’ નામ આપવામાં આવ્યું છે. ઝેલેન્સકીએ સંકેત આપ્યો છે કે આ વાતચીત ઉતાવળમાં આયોજિત કરવામાં આવી છે કારણ કે ટ્રમ્પનું દબાણ વધી રહ્યું છે. મળતી માહિતી મુજબ યુક્રેનના અધિકારીઓ અમેરિકી રાષ્ટ્રપતિ ડોનાલ્ડ ટ્રમ્પના આ દબાણનો ઉકેલ શોધવાનો પ્રયાસ કરી રહ્યા છે.
આ પહેલા બુધવારે અમેરિકી રાષ્ટ્રપતિ ડોનાલ્ડ ટ્રમ્પે કહ્યું હતું કે તેમણે અને યુરોપિયન નેતાઓએ ફોન પર ખૂબ જ મજબૂત શબ્દોમાં નવી દરખાસ્તો પર ચર્ચા કરી હતી. તેમણે કહ્યું કે ઝેલેન્સકીએ શાંતિ યોજના પર તેમના દેશની સ્થિતિ વિશે “વાસ્તવિક” બનવું પડશે અને યુક્રેનિયન પ્રદેશ રશિયાને સોંપવો પડશે.
અમેરિકાનો નવો પ્રસ્તાવ
નોંધનીય છે કે રશિયા અને યુક્રેન વચ્ચેના યુદ્ધમાં સમાધાન સુધી પહોંચવાના પ્રયાસમાં અમેરિકાએ હાલમાં જ એક નવો પ્રસ્તાવ રજૂ કર્યો છે. આ પ્રસ્તાવમાં યુક્રેનને ડોનબાસ સહિત ઘણા વિસ્તારો છોડવા માટે કહેવામાં આવ્યું છે. અમેરિકા ક્રિમીઆ સહિત આ વિસ્તારોને રશિયાના ભાગ તરીકે સત્તાવાર માન્યતા પણ આપશે. દેખીતી રીતે યુક્રેન આ શરતોને સ્વીકારતું નથી. જો કે ટ્રમ્પ યુક્રેન પર આ સમજૂતી માટે સહમત થવા માટે દબાણ કરી રહ્યા છે. હાલમાં ઝેલેન્સ્કી તેના યુરોપિયન સાથીદારોના આશ્રયમાં છે અને તેમની સાથે વાતચીત ચાલી રહી છે.
