ભારતીય ટીમના સ્ટાર ફાસ્ટ બોલર અર્શદીપ સિંહે રવિવારે T20 ઈન્ટરનેશનલમાં બે મોટી સિદ્ધિઓ હાંસલ કરી છે. ભારતીય કેપ્ટન સૂર્યકુમાર યાદવે દક્ષિણ આફ્રિકા સામેની ત્રીજી T20 મેચમાં ટોસ જીતીને બોલિંગ કરવાનો નિર્ણય લીધો હતો. પ્રથમ બોલિંગ કરવા આવેલી ભારતીય ટીમને અર્શદીપ સિંહે મજબૂત શરૂઆત અપાવી હતી. તેણે પહેલી જ ઓવરમાં રીઝા હેન્ડ્રિક્સને પેવેલિયનનો રસ્તો બતાવ્યો હતો. આ વિકેટ લેવાની સાથે જ અર્શદીપ સિંહ એકથી છ ઓવર વચ્ચે સૌથી વધુ વિકેટ લેનારો ભારતીય બોલર બની ગયો છે. તેણે ભુવનેશ્વર કુમારને પાછળ છોડી દીધો.
દક્ષિણ આફ્રિકા સામેની મેચમાં અર્શદીપ સિંહે રિઝાને આઉટ કરીને ભારત માટે T20 ઈન્ટરનેશનલમાં પાવરપ્લેમાં સૌથી વધુ વિકેટ લેવાનો રેકોર્ડ બનાવ્યો હતો. તેણે ભુવનેશ્વર કુમારનો રેકોર્ડ તોડ્યો. ભુવનેશ્વરે T20 ઈન્ટરનેશનલમાં 1-6 ઓવર વચ્ચે ભારત માટે 47 વિકેટ લીધી હતી. જ્યારે અર્શદીપ સિંહના નામે હવે 48 વિકેટ છે. ભારતના દિગ્ગજ ઝડપી બોલર જસપ્રીત બુમરાહના નામે 33 વિકેટ છે અને તે આ યાદીમાં ત્રીજા સ્થાને છે.
અર્શદીપ સિંહે શ્રીલંકાના અનુભવી બોલર લસિથ મલિંગાનો T20 ઈન્ટરનેશનલમાં સૌથી વધુ વિકેટનો રેકોર્ડ તોડી નાખ્યો છે. શ્રીલંકાના દિગ્ગજ ખેલાડી લસિથ મલિંગાએ T20 ઈન્ટરનેશનલમાં 84 મેચમાં 107 વિકેટ લીધી છે જ્યારે અર્શદીપ સિંહે 71 મેચમાં 108 વિકેટ લીધી છે. અર્શદીપ સિંહ T20 ઈન્ટરનેશનલમાં ભારત તરફથી સૌથી વધુ વિકેટ લેનાર બોલર પણ છે. તેણે 108 વિકેટ લીધી છે.
તેમના સિવાય ભારતીય બોલરોમાં માત્ર જસપ્રીત બુમરાહ અને હાર્દિક પંડ્યા 100નો આંકડો પાર કરી શક્યા છે. દક્ષિણ આફ્રિકા સામે ચાલી રહેલી પાંચ મેચની ટી-20 શ્રેણીમાં અર્શદીપ સિંહે 3 મેચમાં 3 વિકેટ ઝડપી છે. જો કે બીજી મેચમાં અર્શદીપ ખૂબ જ મોંઘો પડ્યો હતો અને તેણે 4 ઓવરમાં એકપણ વિકેટ લીધા વિના 54 રન આપી દીધા હતા.
