પાકિસ્તાનના સ્ટાર બેટ્સમેન બાબર આઝમ માટે બિગ બેશ લીગની શરૂઆત સારી રહી ન હતી. સિડની સિક્સર્સ તરફથી રમતા બાબર આઝમ તેની BBL ડેબ્યૂ મેચમાં સસ્તામાં પેવેલિયન પરત ફર્યા હતા. બિગ બેશ લીગમાં પર્થ સ્કોર્ચર્સ સામેની મેચમાં બાબર આઝમ પાસેથી શાનદાર ઇનિંગની અપેક્ષા રાખનારા ચાહકોને જોરદાર આંચકો લાગ્યો હતો. પાકિસ્તાનનો આ સ્ટાર બેટ્સમેન માત્ર પાંચ બોલ રમી શક્યો હતો.
પર્થ સ્ટેડિયમમાં રવિવારે સિડની સિક્સર્સ અને પર્થ સ્કોર્ચર્સ વચ્ચેની મેચ વરસાદને કારણે 11-11 ઓવરની કરવામાં આવી હતી. ટોસ હાર્યા બાદ પ્રથમ બેટિંગ કરવા આવેલા સિડની સિક્સર્સ માટે, બધાની નજર બાબર આઝમ પર હતી, જેને આ સિઝન માટે ડ્રાફ્ટમાં ટીમ દ્વારા પસંદ કરવામાં આવ્યો હતો. પાકિસ્તાનના પૂર્વ કેપ્ટન બાબર આઝમે મુશ્કેલ પરિસ્થિતિમાં માત્ર 5 બોલ રમ્યા અને બે રન બનાવીને પેવેલિયન પરત ફર્યા.
ટૂંકી ઓવરોની મેચ હોવાને કારણે સિડની સિક્સર્સને ઝડપી શરૂઆતની જરૂર હતી પરંતુ તે થઈ શક્યું નહીં. ઓપનર ડેનિયલ હ્યુજીસ ખાતું ખોલાવ્યા વગર જ આઉટ થઈ ગયો હતો, ત્યાર બાદ બાબર આઝમ પણ ત્રીજી ઓવરમાં આઉટ થઈ ગયો હતો. માત્ર 15 રનમાં બે વિકેટ ગુમાવ્યા બાદ ટીમ સંપૂર્ણ દબાણમાં આવી ગઈ હતી. ચાહકોને બાબર આઝમ પાસેથી સારી ઇનિંગની અપેક્ષા હતી પરંતુ તે પહેલી જ મેચમાં ફ્લોપ શો રહ્યો હતો. તેને ઓસ્ટ્રેલિયન પિચો અને પરિસ્થિતિઓમાં એડજસ્ટ થવા માટે વધુ સમયની જરૂર પડશે.
બાબર આઝમનો સાથી ખેલાડી મોહમ્મદ રિઝવાન મેલબોર્ન રેનેગેડ્સ તરફથી બિગ બેશમાં રમી રહ્યો છે. તેના સિવાય પાકિસ્તાનના અન્ય ખેલાડીઓ બાબર આઝમ, શાહીન શાહ આફ્રિદી, શાદાબ ખાન, હરિસ રઉફ અને હસન અલી પણ આ ટૂર્નામેન્ટમાં રમશે.
