અંડર 19 વર્લ્ડ કપ માટે તમામ દેશો એક પછી એક પોતાની ટીમની જાહેરાત કરી રહ્યા છે. આવતા વર્ષે અંડર 19 વર્લ્ડ કપ નામીબિયા અને ઝિમ્બાબ્વેમાં રમાવાનો છે, જેના માટે ભારત અંડર 19 એશિયા કપ પછી પોતાની ટીમની જાહેરાત પણ કરી શકે છે. ઓસ્ટ્રેલિયા અને જાપાન જેવા દેશો પહેલાથી જ પોતાની ટીમ પસંદ કરી ચૂક્યા છે. જાપાનની U19 વર્લ્ડ કપ ટીમની જાહેરાત બાદ નવો ઈતિહાસ સર્જાયો છે. જાપાનની વર્લ્ડ કપ ટીમમાં ત્રણ ભાઈઓને સ્થાન મળ્યું છે. મતલબ કે તે ત્રણેય ભાઈઓ અંડર-19 વર્લ્ડ કપમાં પોતાના દેશ માટે સાથે રમતા જોવા મળશે.
51 વર્ષ પછી ક્રિકેટમાં આવું થશે
ક્રિકેટ ઈતિહાસમાં કોઈ પણ સ્તરે ત્રણ ભાઈઓએ વર્લ્ડ કપ ટીમમાં સ્થાન મેળવ્યું હોય તેવી આ માત્ર બીજી ઘટના છે. અંડર-19 ક્રિકેટ વર્લ્ડ કપના ઈતિહાસમાં આવું પહેલીવાર બન્યું છે. છેલ્લી વખત ત્રણ ભાઈઓને 1975ના ODI વર્લ્ડ કપ માટે ન્યૂઝીલેન્ડની ટીમમાં સ્થાન મળ્યું હતું. ત્યારબાદ રિચર્ડ હેડલી, બેરી હેડલી અને ડેલ હેડલીને ન્યુઝીલેન્ડ તરફથી એકસાથે વર્લ્ડ કપ રમવાનો મોકો મળ્યો. હવે 51 વર્ષ બાદ 2026માં સિનિયર લેવલ પર નહીં પણ અંડર-19 લેવલ પર રમાનારા વર્લ્ડ કપમાં જાપાનના ત્રણ ક્રિકેટર ભાઈઓ એક જ ટીમમાં સાથે જોવા મળશે.
આ 3 ભાઈઓએ ઈતિહાસ રચ્યો
જાપાને અંડર-19 વર્લ્ડ કપ 2026 માટે તેની 15 સભ્યોની ટીમની જાહેરાત કરી છે. જાપાનની ટીમમાં જે ત્રણ ક્રિકેટર ભાઈઓની પસંદગી કરવામાં આવી છે તેમના નામ મોન્ટગોમરી હારા હેઈન્ઝ, ગેબ્રિયલ હારા હેઈન્ઝ અને ચાર્લ્સ હારા હેઈન્ઝ છે. આ ત્રણમાંથી ચાર્લ્સ સૌથી મોટો ભાઈ છે.
U19 વર્લ્ડ કપ 2026ના ગ્રુપ Aમાં જાપાન
જાપાનની ટીમને અંડર-19 વર્લ્ડ કપ 2026ના ગ્રુપ Aમાં રાખવામાં આવી છે. જાપાન સિવાય આ ગ્રુપમાં અન્ય ત્રણ ટીમો છે – ઓસ્ટ્રેલિયા, શ્રીલંકા અને આયર્લેન્ડ. જાપાનની ટીમ 5 જાન્યુઆરીએ આફ્રિકા જવા રવાના થશે, જ્યાં તે 10 જાન્યુઆરીએ તાન્ઝાનિયા સામે વોર્મ-અપ મેચ રમશે. 12 જાન્યુઆરીએ બીજી વોર્મ-અપ મેચમાં તેનો સામનો વેસ્ટ ઈન્ડિઝ સામે થશે.
