T20 ઈન્ટરનેશનલમાં વિશ્વના નંબર વન બેટ્સમેન અભિષેક શર્માએ સિક્સર મારવાના મામલે નવો રેકોર્ડ બનાવ્યો છે. તે T20માં સૌથી ઝડપી 300 સિક્સર મારનાર ભારતીય બેટ્સમેન બની ગયો છે. એક દિવસ પહેલા સાઉથ આફ્રિકા સામેની ત્રીજી T20 ઈન્ટરનેશનલમાં શર્માને સૌથી ઝડપી 300 સિક્સર મારનાર ભારતીય બનવા માટે 3 સિક્સરની જરૂર હતી. પીછો કરતી વખતે શર્માએ માત્ર 5મી ઓવરમાં આ રેકોર્ડ હાંસલ કર્યો હતો. તેણે ઓટેનિલ બાર્ટમેનની તે ઓવરના પહેલા જ બોલ પર સિક્સ ફટકારીને T20માં 300 સિક્સર ફટકારવાની સિદ્ધિ હાંસલ કરી હતી.
અભિષેક શર્મા પહેલા T20માં સૌથી ઝડપી 300 સિક્સર ફટકારવાનો રેકોર્ડ કેએલ રાહુલના નામે હતો. રાહુલે 205 T20 ઇનિંગ્સમાં 300 સિક્સરનો આંકડો સ્પર્શ કર્યો હતો પરંતુ અભિષેક શર્માએ માત્ર 163 ઇનિંગ્સમાં આ સિદ્ધિ મેળવી છે.
T20માં સૌથી ઓછી ઇનિંગ્સમાં 300 સિક્સર મારનાર ભારતીયોમાં સૂર્યકુમાર યાદવ બીજા ક્રમે હતો અને હવે તે ત્રીજા સ્થાને સરકી ગયો છે. યાદવે પોતાની 251મી ઇનિંગમાં 300 સિક્સરનો આંકડો પાર કર્યો હતો.
T20માં સૌથી વધુ છગ્ગાનો રેકોર્ડ યુનિવર્સ બોસ તરીકે જાણીતા ક્રિસ ગેલના નામે છે. તેણે 455 ઇનિંગ્સમાં 1056 સિક્સર ફટકારી છે. તે T20માં 1000 સિક્સર મારનાર પ્રથમ અને અત્યાર સુધીનો એકમાત્ર બેટ્સમેન છે. વેસ્ટ ઈન્ડિઝના કિરોન પોલાર્ડે 644 ટી20 ઈનિંગ્સમાં 971 સિક્સર ફટકારી છે અને તે ટી20માં સૌથી વધુ સિક્સ ફટકારવાના મામલે ગેઈલ પછી બીજા ક્રમે છે.
જો આપણે T20માં સૌથી વધુ સિક્સર મારનાર ભારતીયની વાત કરીએ તો આ રેકોર્ડ રોહિત શર્માના નામે છે. તેણે T20ની 450 ઇનિંગ્સમાં 547 સિક્સર ફટકારી છે. બીજા સ્થાને વિરાટ કોહલી છે જેણે 397 ઇનિંગ્સમાં 435 સિક્સર ફટકારી છે. ત્રીજા નંબર પર સૂર્યકુમાર યાદવ છે જેણે 319 T20 ઇનિંગ્સમાં 395 સિક્સર ફટકારી છે. 302 ઇનિંગ્સમાં 368 સિક્સર મારનાર ભારતીયોમાં સંજુ સેમસન ચોથા ક્રમે છે.
