ભારતીય ઓલરાઉન્ડર હાર્દિક પંડ્યાએ શુક્રવારે અમદાવાદમાં દક્ષિણ આફ્રિકા સામે રમાયેલી 5મી T20 મેચમાં મોટી સિદ્ધિ મેળવી છે. હાર્દિકે T20 ઈન્ટરનેશનલ ક્રિકેટમાં 2000 રન પૂરા કર્યા છે. આ સાથે તેણે વિરાટ કોહલી, રોહિત શર્મા, સૂર્યકુમાર યાદવ અને કેએલ રાહુલની વિશિષ્ટ ક્લબમાં જગ્યા બનાવી લીધી છે. હાર્દિક પંડ્યા T20 ઈન્ટરનેશનલમાં 2000 રન બનાવનાર પાંચમો ભારતીય બેટ્સમેન બની ગયો છે. આજની મેચ હાર્દિક માટે ઘણી રીતે ખાસ હતી. એક તરફ, તેણે 2,000 રનનો આંકડો પાર કર્યો, જ્યારે બીજી તરફ, તેણે ભારત માટે બીજી સૌથી ઝડપી અડધી સદી ફટકારી અને તેની ટીમને દક્ષિણ આફ્રિકા સામેની શ્રેણી 3-1થી જીતવામાં મદદ કરવામાં મહત્વપૂર્ણ ભૂમિકા ભજવી.
હાર્દિક પંડ્યા હવે T20 ઈન્ટરનેશનલ ઈતિહાસમાં એવા કેટલાક ઓલરાઉન્ડરોમાં સામેલ થઈ ગયો છે જેમના નામે 2,000થી વધુ રન અને 100થી વધુ વિકેટ છે. ભારત માટે T20 ઈન્ટરનેશનલમાં સૌથી વધુ રન બનાવવાનો રેકોર્ડ રોહિત શર્માના નામે છે. રોહિતે 159 મેચમાં 4231 રન બનાવ્યા છે. પૂર્વ કેપ્ટને 5 સદી ફટકારી છે. પૂર્વ ભારતીય ટી20 બેટ્સમેન વિરાટ કોહલીએ 125 મેચમાં 4188 રન બનાવ્યા છે. કોહલીએ આ ફોર્મેટમાં માત્ર એક સદી ફટકારી છે. સૂર્યકુમાર યાદવે 4 સદી ફટકારી છે. તેણે 99 મેચમાં 2788 રન બનાવ્યા છે.
હાર્દિક પંડ્યાએ માત્ર 16 બોલમાં પોતાની અડધી સદી ફટકારી હતી, જે ભારત માટે બીજી સૌથી ઝડપી અડધી સદી છે. તિલક વર્માએ 73 રન ઉમેર્યા હતા, જેની મદદથી ભારતે પાંચ વિકેટે 231 રન બનાવ્યા હતા. જવાબમાં દક્ષિણ આફ્રિકાએ સારી શરૂઆત કરી હતી અને ક્વિન્ટન ડી કોક (65) ક્રિઝ પર હોવાથી ટીમ જીત તરફ આગળ વધી રહી હતી પરંતુ 81 રનની અંદર છેલ્લી સાત વિકેટ ગુમાવી દેતાં તે આઠ વિકેટે 201 રન જ બનાવી શકી હતી. ભારત તરફથી જસપ્રીત બુમરાહે ચાર ઓવરમાં 17 રન આપીને બે વિકેટ ઝડપી હતી.
ભારત માટે T20I માં 2000 થી વધુ રન બનાવનાર બેટ્સમેન
રોહિત શર્મા- 159 મેચ, 4231 રન
