સ્ટાર ઓલરાઉન્ડર હાર્દિક પંડ્યાએ શુક્રવારે દક્ષિણ આફ્રિકા સામેની પાંચમી T20 મેચ દરમિયાન વિસ્ફોટક ઇનિંગ રમી હતી. તેણે આફ્રિકન બોલરોને પછાડ્યા અને T20 ઈન્ટરનેશનલમાં સૌથી ઝડપી અડધી સદી ફટકારનાર બીજા બેટ્સમેન બનીને ભારત માટે રેકોર્ડ બનાવ્યો. લાઈવ મેચ દરમિયાન હાર્દિક પંડ્યાના ઘણા શોટ્સ પર કેમેરા તેની ગર્લફ્રેન્ડ તરફ પણ જઈ રહ્યો હતો, જે તેને સપોર્ટ કરવા સ્ટેડિયમમાં હાજર હતી. હાર્દિક પંડ્યાએ માત્ર 16 બોલમાં પોતાની અડધી સદી પૂરી કરી હતી. ફિફ્ટી ફટકાર્યા બાદ હાર્દિકે મેદાન પર કંઈક એવું કર્યું જેનાથી ફેન્સ ચોંકી ગયા. તેણે તેની ગર્લફ્રેન્ડ માહિકા શર્માને ફ્લાઈંગ કિસ આપી હતી, જેનો વીડિયો સોશિયલ મીડિયા પર વાયરલ થઈ રહ્યો છે.
હાર્દિક પંડ્યાએ માત્ર 16 બોલમાં પોતાની સાતમી અડધી સદી ફટકારી હતી. યુવરાજ સિંહની 12 બોલમાં અડધી સદી બાદ ભારતીય બેટ્સમેન દ્વારા આ સૌથી ઝડપી અર્ધસદી છે. યુવરાજે 2007માં કિંગ્સમીડ ખાતે ઈંગ્લેન્ડ સામે છ બોલમાં છ છગ્ગા ફટકારીને આ સિદ્ધિ મેળવી હતી. પંડ્યાએ 25 બોલમાં પાંચ ચોગ્ગા અને પાંચ છગ્ગાની મદદથી 63 રન બનાવ્યા હતા. ઓલરાઉન્ડર હાર્દિકે પોતાની અડધી સદી પૂરી કર્યા બાદ અલગ જ રીતે ઉજવણી કરી હતી. તેણે તેની ગર્લફ્રેન્ડ માહિકા શર્માને ફ્લાઈંગ કિસ આપી અને માહિકાએ પણ પોતાનો પ્રેમ વ્યક્ત કર્યો. બંને વચ્ચેના પ્રેમની આ પળ સોશિયલ મીડિયા પર ખૂબ જ ઝડપથી વાયરલ થઈ રહી છે.
હાર્દિકે તિલક સાથે ચોથી વિકેટ માટે 44 બોલમાં 105 રનની ભાગીદારી કરી હતી. તિલકે 42 બોલમાં દસ ચોગ્ગા અને એક છગ્ગાની મદદથી 73 રન ઉમેર્યા હતા. પંડ્યાની તોફાની ઇનિંગ્સ વચ્ચે તિલક એક છેડો પકડીને સ્ટ્રાઇક ફેરવતો રહ્યો. આ પહેલા અભિષેક શર્મા (34) અને સંજુ સેમસને (37) છઠ્ઠી ઓવરમાં જ ભારતને 63 રન સુધી પહોંચાડ્યું હતું.
