એક તરફ સમગ્ર વિશ્વ નવા વર્ષની ઉજવણીની તૈયારી કરી રહ્યું છે ત્યારે બીજી તરફ જાપાનમાં આવેલા ભૂકંપથી ધરતી હચમચી ગઈ છે. નવા વર્ષની પૂર્વ સંધ્યાએ જાપાનમાં રિક્ટર સ્કેલ પર છની તીવ્રતાનો ભૂકંપ આવ્યો. યુનાઇટેડ સ્ટેટ્સ જીઓલોજિકલ સર્વે અનુસાર, 31 ડિસેમ્બર, બુધવારે જાપાનના નોડા શહેરમાં 6 ની તીવ્રતાનો ભૂકંપ આવ્યો હતો.
યુએસજીએસએ જણાવ્યું કે ભૂકંપ નોડાથી લગભગ 91 કિલોમીટર પૂર્વમાં આવ્યો હતો અને તેની ઊંડાઈ 19.3 કિલોમીટર હતી. ભૂકંપ વિશે આશ્વાસન આપનારી બાબત એ છે કે કોઈ જાન-માલની નુકસાની કે નુકસાન અંગે કોઈ તાત્કાલિક માહિતી પ્રાપ્ત થઈ નથી. વધુમાં, નવા વર્ષની પૂર્વ સંધ્યાએ તિબેટમાં બપોરના સમયે 3.4ની તીવ્રતાનો ભૂકંપ આવ્યો હતો. ભૂકંપ ભારતીય સમય અનુસાર બપોરે 3.26 કલાકે 10 કિલોમીટરની ઉંડાઈએ આવ્યો હતો.
આ પહેલા 9 ડિસેમ્બરે ઉત્તર જાપાનમાં મોડી રાત્રે 7.5ની તીવ્રતાનો શક્તિશાળી ભૂકંપ આવ્યો હતો, જેમાં 33 લોકો ઘાયલ થયા હતા અને પ્રશાંત મહાસાગરના તટીય વિસ્તારોમાં સુનામી આવી હતી. અધિકારીઓએ આ માહિતી આપી હતી. ફાયર એન્ડ ડિઝાસ્ટર મેનેજમેન્ટ એજન્સીએ જણાવ્યું કે 33 લોકો ઘાયલ થયા છે, જેમાં એક ગંભીર છે. પબ્લિક બ્રોડકાસ્ટર NHKએ અહેવાલ આપ્યો છે કે મોટા ભાગના લોકો વસ્તુઓ પડી જવાથી ઘાયલ થયા હતા.
જાપાનના મુખ્ય હોન્શુ ટાપુના ઉત્તરીય પ્રાંત અઓમોરીના કિનારે લગભગ 80 કિલોમીટર દૂર પેસિફિક મહાસાગરમાં લગભગ 11:15 કલાકે ભૂકંપ આવ્યો હતો. યુ.એસ. જીઓલોજિકલ સર્વેએ ભૂકંપની તીવ્રતા 7.6 માપી અને કહ્યું કે તે સપાટીથી 44 કિલોમીટર (27 માઇલ) નીચે આવ્યો હતો. ઓમોરી પ્રીફેક્ચરના હાચિનોહે શહેરમાં દુકાનના માલિક નોબુઓ યામાદાએ NHK ને જણાવ્યું, “મેં આટલો તીવ્ર ભૂકંપ ક્યારેય જોયો નથી.” આ તીવ્ર ભૂકંપ બાદ જાપાનમાં અન્ય કેટલાય ભૂકંપ પણ અનુભવાયા છે.
