મુંબઈઃબોલિવૂડની ટોચની અભિનેત્રી આલિયા ભટ્ટે રણવીર સિંહની સુપરહિટ ફિલ્મ ‘ધુરંધર’ના વખાણ કર્યા છે. આલિયાએ તેના પ્રોડક્શન હાઉસ ‘Eternal Sunshine Productions’ ના સોશિયલ મીડિયા હેન્ડલ પરથી એક ખાસ પોસ્ટ શેર કરી, જેમાં તેણે ફિલ્મને ‘આજના ભારતનો અવાજ’ અને ‘આજના ભારતની પસંદગી’ ગણાવી. આ પોસ્ટમાં આલિયાએ સમગ્ર ટીમને અભિનંદન પાઠવ્યા હતા અને ફિલ્મની ઐતિહાસિક સફળતા પર ખુશી વ્યક્ત કરી હતી.
આલિયાએ ‘ધુરંધર’ને ‘આજના ભારતનો અવાજ’ કહ્યો
‘ધુરંધર’ એક સ્પાય એક્શન થ્રિલર ફિલ્મ છે, જેનું નિર્દેશન આદિત્ય ધર દ્વારા કરવામાં આવ્યું છે. ફિલ્મમાં રણવીર સિંહ લીડ રોલમાં છે અને તેની સાથે અક્ષય ખન્ના, સંજય દત્ત, અર્જુન રામપાલ જેવા સ્ટાર્સ છે. આ ફિલ્મ 5 ડિસેમ્બર 2025ના રોજ રીલિઝ થઈ હતી અને રિલીઝ થઈ ત્યારથી બોક્સ ઓફિસ પર કમાણી કરી રહી છે. અત્યાર સુધી તે 2025ની સૌથી મોટી હિટ ફિલ્મ બની ગઈ છે અને તેણે ઘણા રેકોર્ડ તોડ્યા છે. તેણે ભારતમાં રૂ. 800 કરોડથી વધુની કમાણી કરી છે અને વિશ્વવ્યાપી કલેક્શન પણ લાજવાબ છે.
આલિયાની પોસ્ટમાં લખ્યું છે કે ‘ધુરંધર’ ભારતીય સિનેમાના ઈતિહાસમાં એક નંબર વન ચેપ્ટર છે. આ ફિલ્મ ઈતિહાસના મહત્વના પ્રકરણ પર આધારિત છે અને દર્શકોને ખૂબ જ પસંદ આવી છે. આલિયાએ તેને ‘મૂવી મેજિક’ પણ કહ્યું અને ટીમની મહેનતની પ્રશંસા કરી. ચાહકો આ પોસ્ટને ખૂબ પસંદ કરી રહ્યા છે, કારણ કે આલિયા અને રણવીર સારા મિત્રો છે અને બંનેએ અગાઉ ‘ગલી બોય’ જેવી હિટ ફિલ્મોમાં સાથે કામ કર્યું છે.
‘ધુરંધર’ની સફળતા માટે ઘણા પ્રોડક્શન હાઉસે અભિનંદન પાઠવ્યા
આ દિવસોમાં આલિયા ભટ્ટ પોતાના પરિવાર સાથે નવા વર્ષની રજાઓ મનાવીને પરત ફરી છે. તે તેના પતિ રણબીર કપૂર અને પુત્રી રાહા સાથે ક્વોલિટી ટાઈમ વિતાવી રહી છે. ‘ધુરંધર’ની સફળતા પર બોલિવૂડના ઘણા પ્રોડક્શન હાઉસ અભિનંદન આપી રહ્યા છે. આલિયાનો આ સપોર્ટ દર્શાવે છે કે ઈન્ડસ્ટ્રીના સ્ટાર્સ એકબીજાની સફળતા પર કેટલા ખુશ છે.
