મધ્ય પૂર્વમાં ઈરાન સાથે વધી રહેલા તણાવ વચ્ચે અમેરિકાએ હવે એક એવી જાહેરાત કરી છે જેનાથી ચીન નારાજ થઈ શકે છે. અમેરિકાએ ગુરુવારે તાઈવાન સાથેના મોટા વેપાર કરારને મંજૂરી આપી છે. એટલું જ નહીં, આ કરાર દ્વારા સેમિકન્ડક્ટરના ક્ષેત્રમાં ચીનના વર્ચસ્વને સીધો પડકાર આપવાનો પ્રયાસ કરવામાં આવ્યો છે. કરાર હેઠળ, યુએસ તાઈવાનના સામાન પર ટેરિફમાં ઘટાડો કરશે. તેના બદલામાં, તાઇવાન અમેરિકામાં યુએસ $250 બિલિયનનું નવું રોકાણ કરશે.
અમેરિકાએ તેને ઐતિહાસિક વેપાર કરાર ગણાવ્યો છે અને કહ્યું છે કે તે અમેરિકાના સેમિકન્ડક્ટર સેક્ટરને પ્રોત્સાહન આપશે. અગાઉ ટ્રમ્પે તાઈવાનથી આવતા સામાન પર 32 ટકા ડ્યૂટી નક્કી કરી હતી, જે બાદમાં ઘટાડીને 20 ટકા કરી દેવામાં આવી હતી. નવા કરાર હેઠળ, ડ્યુટીનો દર હવે વધુ ઘટાડીને 15 ટકા કરવામાં આવ્યો છે, જે આ ક્ષેત્રમાં જાપાન અને દક્ષિણ કોરિયા પર લાદવામાં આવેલા ટેરિફની બરાબર છે.
અમેરિકી વાણિજ્ય મંત્રાલયે એક નિવેદનમાં જણાવ્યું છે કે તાઈવાન સાથેનો આ કરાર આર્થિક ભાગીદારી સ્થાપિત કરશે, જેના હેઠળ ઘરેલું ઉત્પાદનને વેગ આપવા માટે અમેરિકામાં અનેક વિશ્વ-સ્તરીય ઔદ્યોગિક પાર્ક બનાવવામાં આવશે. જ્યારે તાઈવાન સરકારે એક નિવેદનમાં આ કરારની પુષ્ટિ કરતા કહ્યું કે આનાથી બંને દેશો વચ્ચે વ્યૂહાત્મક સહયોગ વધુ ગાઢ બનશે.
ગયા મહિનાની શરૂઆતમાં, અમેરિકાએ તાઇવાનને $11 બિલિયનના શસ્ત્રો, સાધનો અને લશ્કરી સેવાઓના વેચાણને મંજૂરી આપવાની પણ જાહેરાત કરી હતી. તાઈવાનને યુએસ શસ્ત્રોના માલસામાનમાં જેવલિન સિસ્ટમ્સ, એલ્ટિયસ-700એમ અને અલ્ટીયસ-600 માનવરહિત હવાઈ વાહનો, AH-1W સુપરકોબ્રા હેલિકોપ્ટરના સ્પેરપાર્ટ્સ, HIMARS મલ્ટીપલ-લોન્ચ રોકેટ સિસ્ટમ્સ, M107A7 સેલ્ફ-પ્રોપેલ્ડ આર્ટિલરી સિસ્ટમ્સ અને TOW મિસાઈલ એન્ટીક સિસ્ટમનો સમાવેશ થાય છે. અમેરિકાના આ પગલાથી ચીન ભારે નારાજ થઈ ગયું હતું અને તેના જવાબમાં ઘણી અમેરિકન કંપનીઓ પર પ્રતિબંધ લગાવી દીધો હતો. ચીને તેને પોતાની સાર્વભૌમત્વનું ઉલ્લંઘન ગણાવ્યું છે.
