ગુવાહાટીના બરસાપારા ક્રિકેટ સ્ટેડિયમમાં ભારત અને ન્યૂઝીલેન્ડ વચ્ચે રમાયેલી ત્રીજી T20 મેચમાં ભારતીય ઓપનર ઈશાન કિશનનું જબરદસ્ત પ્રદર્શન જોવા મળ્યું. ભારતે ટોસ જીતીને પ્રથમ બોલિંગ કરવાનું પસંદ કર્યું અને ન્યૂઝીલેન્ડને 153 રન સુધી રોકી દીધું, ત્યારબાદ લક્ષ્યનો પીછો કરતી વખતે ઇશાન કિશને પહેલી જ ઓવરમાં કિવી બોલરો પર હુમલો કર્યો. ઈશાને મેચની પ્રથમ ઓવરમાં 16 રન બનાવીને નવો રેકોર્ડ બનાવ્યો હતો. તે T20 આંતરરાષ્ટ્રીય ક્રિકેટ ઇતિહાસમાં ભારતીય બેટ્સમેન દ્વારા પ્રથમ ઓવરમાં સૌથી વધુ રન બનાવનાર સંયુક્ત ત્રીજો બેટ્સમેન બન્યો. આ યાદીમાં તેનાથી આગળ માત્ર વીરેન્દ્ર સેહવાગ (18 રન વિ. ન્યુઝીલેન્ડ, 2009) અને રોહિત શર્મા (17 રન વિ. સાઉથ આફ્રિકા, 2018) છે.
ઈશાન કિશને પ્રથમ ઓવરમાં 16 રન બનાવ્યા હતા જ્યારે બીજા છેડે સંજુ સેમસન ઇનિંગના પહેલા જ બોલ પર આઉટ થયો હતો. પ્રથમ વિકેટ પડી જવાથી ઈશાનને જરાય પરેશાની ન થઈ અને તેણે આવતાની સાથે જ કિવી બોલર મેટ હેનરી પર હુમલો કર્યો. ઈશાન કિશન તેની ઈનિંગના પ્રથમ બોલ પર કોઈ રન બનાવી શક્યો ન હતો, પરંતુ પછીના બે બોલ પર બે ગગનચુંબી છગ્ગા અને પછીના બોલ પર એક ચોગ્ગો ફટકારીને સ્કોર 16 રન સુધી લઈ ગયો હતો. ઓવરના છેલ્લા બોલ પર તે કોઈ રન બનાવી શક્યો નહોતો. ઈશાન કિશને આઉટ થતા પહેલા 13 બોલમાં 28 રનની શાનદાર ઈનિંગ રમીને ભારતને વિસ્ફોટક શરૂઆત અપાવી હતી.
ઈશાન કિશનની આ આક્રમક શરૂઆત બાદ અભિષેક શર્મા અને સુકાની સૂર્યકુમાર યાદવે ન્યૂઝીલેન્ડના બોલરોને બરબાદ કરી દીધા હતા. ભારતે પાવરપ્લેની માત્ર 6 ઓવરમાં 94/2નો વિશાળ સ્કોર બનાવ્યો, જે T20 આંતરરાષ્ટ્રીય ક્રિકેટમાં ટીમ ઈન્ડિયાના સૌથી સફળ પાવરપ્લે પ્રદર્શનમાંનું એક છે. અભિષેક શર્માએ 340.00ના અવિશ્વસનીય સ્ટ્રાઇક રેટથી માત્ર 20 બોલમાં 68 રનની અણનમ ઇનિંગ રમી હતી, જેમાં 7 ચોગ્ગા અને 5 આકાશી છગ્ગાનો સમાવેશ થતો હતો. આ સાથે જ કેપ્ટન સૂર્યકુમાર યાદવે 26 બોલમાં અણનમ 57 રન બનાવ્યા હતા. બીજી વિકેટ માટે આ બંને બેટ્સમેન વચ્ચે માત્ર 40 બોલમાં 102 રનની અતૂટ ભાગીદારી થઈ હતી, જેના કારણે ભારતે 154 રનનો લક્ષ્યાંક માત્ર 10 ઓવરમાં હાંસલ કર્યો હતો અને 8 વિકેટે શાનદાર જીત નોંધાવી હતી.
T20I મેચની પ્રથમ ઓવરમાં સૌથી વધુ રન બનાવનાર ભારતીય બેટ્સમેનઃ
• 18 રન: વિરેન્દ્ર સેહવાગ વિ ન્યુઝીલેન્ડ (2009)
