ન્યૂઝીલેન્ડના વિસ્ફોટક બેટ્સમેન ગ્લેન ફિલિપ્સે બુધવારે ભારત સામેની મેચ દરમિયાન એક મોટી સિદ્ધિ હાંસલ કરી હતી. પ્રથમ મેચમાં જોરદાર અડધી સદી ફટકારનાર ગ્લેન ફિલિપ્સ વિશાખાપટ્ટનમમાં મોટી ઇનિંગ્સ રમી શક્યો ન હતો પરંતુ T20 ઇન્ટરનેશનલમાં 100 સિક્સર પૂરી કરી હતી. ગ્લેન ફિલિપ્સે તેની ઇનિંગ દરમિયાન સિક્સર ફટકારી અને આ સાથે તે T20 ઇન્ટરનેશનલમાં 100 સિક્સર મારનાર ન્યૂઝીલેન્ડનો ત્રીજો બેટ્સમેન બન્યો. બુધવારે ભારત સામેની ચોથી મેચમાં ન્યૂઝીલેન્ડે 20 ઓવરમાં 7 વિકેટ ગુમાવીને 215 રન બનાવ્યા હતા.
ચોથી મેચમાં ગ્લેન ફિલિપ્સ વધુ સમય સુધી ક્રિઝ પર ટકી શક્યો નહોતો અને 16 બોલમાં 24 રન બનાવી કુલદીપ યાદવનો શિકાર બન્યો હતો. તેણે પોતાની ઇનિંગમાં ત્રણ ચોગ્ગા અને એક છગ્ગો ફટકાર્યો હતો. 5 મેચની T20 શ્રેણીની ચોથી મેચમાં વિશાખાપટ્ટનમના ડો.વાય.એસ. રાજશેખર રેડ્ડી ક્રિકેટ સ્ટેડિયમ ખાતે, ફિલિપ્સે કુલદીપ યાદવની બોલ પર એક શાનદાર સિક્સર ફટકારી અને T20 ઇન્ટરનેશનલમાં 100 સિક્સર પૂરી કરી. ન્યુઝીલેન્ડ માટે આવું કરનાર તે ત્રીજો બેટ્સમેન બની ગયો છે. આ પહેલા માર્ટિન ગુપ્ટિલ અને કોલિન મુનરોએ આ સિદ્ધિ મેળવી હતી.
