ગુરુવારે, દિલ્હી સામેની રણજી ટ્રોફી ગ્રુપ ડી મેચના પ્રથમ દિવસે, મુંબઈના ખેલાડીઓએ બાંધકામના કામને કારણે થતા પ્રદૂષણથી પોતાને બચાવવા માટે માસ્ક પહેરવા પડ્યા હતા. ભારતીય અને મુંબઈના બેટ્સમેન સરફરાઝ ખાન, તેનો નાનો ભાઈ મુશીર ખાન અને સ્પિનર હિમાંશુ સિંહ એમસીએ-બીકેસી ગ્રાઉન્ડ પર ત્રીજા સત્ર દરમિયાન માસ્ક પહેરેલા જોવા મળ્યા હતા.
એર ક્વોલિટી ઇન્ડેક્સ (AQI) ગુરુવારે 160 ની આસપાસ હતો. શહેરમાં પ્રદૂષણનું ઊંચું સ્તર હોવા છતાં, ખેલાડીઓ રમતી વખતે માસ્ક પહેરવાનું સામાન્ય નથી. એમસીએ-બીકેસી ગ્રાઉન્ડની બાજુમાં આવેલી કન્સ્ટ્રક્શન સાઇટને કારણે બપોરના સમયે પરિસ્થિતિ વધુ ખરાબ થઈ હતી.
આ દરમિયાન મુંબઈના ત્રણેય ખેલાડીઓએ લગભગ અડધો કલાક ફિલ્ડિંગ કરતી વખતે માસ્ક પહેર્યા હતા પરંતુ બાદમાં તેમને હટાવી દીધા હતા. જ્યારે ખેલાડીઓને માસ્ક પહેરવા વિશે પૂછવામાં આવ્યું ત્યારે મુંબઈના ફાસ્ટ બોલર મોહિત અવસ્થીએ કહ્યું, “અહીં નવી ઈમારતનું નિર્માણ કાર્ય ચાલી રહ્યું છે. ખેલાડીઓને પ્રદૂષણ લાગ્યું હતું અને તેમને શ્વાસ લેવામાં તકલીફ થઈ રહી હતી, તેથી તેઓએ માસ્ક પહેર્યા હતા.
સનત સાંગવાનની શાનદાર સદી છતાં દિલ્હીની ટીમ મુંબઈ સામેની રણજી ટ્રોફી ગ્રુપ ડી મેચના પ્રથમ દિવસે તેની પ્રથમ ઇનિંગમાં 221 રનમાં ઓલઆઉટ થઈ ગઈ હતી. મુંબઈ તરફથી મોહિત અવસ્થીએ 62 રનમાં પાંચ વિકેટ લઈને શાનદાર પ્રદર્શન કર્યું હતું. દિવસની રમતના અંતે મુંબઈએ એક વિકેટે 13 રન બનાવી લીધા હતા. સાંગવાને 118 રનની ઇનિંગ સાથે એક છેડો પકડી રાખ્યો હતો પરંતુ તેને બીજા છેડેથી કોઈ બેટ્સમેનનો સારો સાથ મળ્યો નહોતો. વર્તમાન સિઝનમાં તેની ત્રીજી સદી દરમિયાન તેણે 218 બોલમાં 11 ચોગ્ગા અને બે છગ્ગા ફટકાર્યા હતા.
25 વર્ષીય બેટ્સમેને વૈભવ કંદપાલ (32) સાથે બીજી વિકેટ માટે 100 રનની ભાગીદારી કરી, જેણે દિવસની શરૂઆતમાં દિલ્હીને મજબૂત સ્થિતિમાં પહોંચાડ્યું. પ્રથમ સેશનમાં દિલ્હીનો સ્કોર એક વિકેટે 111 રન હતો. જોકે, અવસ્થીએ લંચ પછી છ ઓવરના સ્પેલમાં ત્રણ વિકેટ લઈને દિલ્હીના મિડલ ઓર્ડરને હચમચાવી નાખ્યો હતો. અવસ્થીએ દિલ્હીના કેપ્ટન આયુષ ડોસેજા (શૂન્ય) અને સુમિત માથુર (બે)ને વિકેટ પાછળ કેચ આઉટ કરાવી દીધા હતા. તેણે નવોદિત આર્યન રાણાને પ્રથમ સ્લિપમાં સરફરાઝ ખાનના હાથે કેચ કરાવ્યો હતો.
