ટેસ્ટ, T20 કે ODI… ગમે તે ફોર્મેટ હોય, જ્યારે રનનો પીછો કરવાની વાત આવે છે ત્યારે દરેકના મગજમાં એક જ નામ આવે છે ‘વિરાટ કોહલી’. કોહલીએ તેની કારકિર્દીમાં રન ચેઝ દરમિયાન ભારતને ઘણી આશ્ચર્યજનક મેચો જીતાડવી છે. તેમના આંકડા પણ સાક્ષી પૂરે છે કે તેમને શા માટે ‘ચેઝ માસ્ટર’ કહેવામાં આવે છે. જો કે, હવે T20 ક્રિકેટમાં પીછો કરતી વખતે 2 વધુ ભારતીયોની સરેરાશ તેના કરતા સારી છે. હા, આમાંથી એક નામ શિવમ દુબેનું છે અને બીજું નામ તિલક વર્માનું છે. દુબેએ ન્યૂઝીલેન્ડ વિરૂદ્ધ ચોથી T20માં 65 રનની વિસ્ફોટક ઇનિંગ રમી હતી, જે બાદ તેની બેટિંગ એવરેજમાં જબરદસ્ત ઉછાળો આવ્યો છે.
T20માં ટાર્ગેટનો પીછો કરતી વખતે શિવમ દુબેની બેટિંગ એવરેજ 82.5 થઈ ગઈ છે, જ્યારે કોહલીની 67.1 છે. દુબે અને કોહલી વચ્ચે તિલક વર્મા પણ હાજર છે, જેની બેટિંગ એવરેજ T20માં પીછો કરતી વખતે 68 છે. જોકે, હાલમાં તિલક ઈજાના કારણે ટીમની બહાર છે.
જો આપણે T20I ચેઝમાં શ્રેષ્ઠ એવરેજ ધરાવતા ટોપ-5 ખેલાડીઓ વિશે વાત કરીએ, જેમણે ઓછામાં ઓછી 10 ઇનિંગ્સ રમી હોય, તો આ યાદીમાં 5માંથી 4 નામ ભારતીય છે. આ યાદીમાં એમએસ ધોની છઠ્ઠા સ્થાને છે.
શિવમ દુબે, તિલક વર્મા અને વિરાટ કોહલી ટોપ-3માં છે. દિનેશ કાર્તિક ચોથા સ્થાને અને ઓસ્ટ્રેલિયાના માઈક હસી પાંચમા અને છેલ્લા સ્થાને છે.
