અંડર-19 વર્લ્ડ કપમાં આજે ભારત અને પાકિસ્તાન વચ્ચે ‘મહામુકાબલા’ રમાશે. આજે બંને ટીમો સેમીફાઈનલમાં પોતાનું સ્થાન નિશ્ચિત કરવાના ઈરાદા સાથે મેદાનમાં ઉતરશે. તમને જણાવી દઈએ કે, ઓસ્ટ્રેલિયા, અફઘાનિસ્તાન અને ઈંગ્લેન્ડ પહેલાથી જ સેમીફાઈનલની ટિકિટ બુક કરી ચૂક્યા છે, તેથી માત્ર એક સ્લોટ બાકી છે અને તેના માટે આજે ભારત અને પાકિસ્તાનની ટીમો મેદાનમાં સામસામે ટકરાશે. આ ટુર્નામેન્ટ ભારત માટે અત્યાર સુધી શાનદાર રહી છે. ટીમ ઈન્ડિયા હજુ સુધી એક પણ મેચ હારી નથી. જ્યારે પાકિસ્તાનને ગ્રુપ સ્ટેજમાં ઈંગ્લેન્ડના હાથે એકમાત્ર હારનો સામનો કરવો પડ્યો હતો. આ પછી મેન ઇન ગ્રીને શાનદાર વાપસી કરી હતી. ચાલો ભારત અને પાકિસ્તાન વચ્ચેના સેમિફાઇનલ સમીકરણ પર એક નજર કરીએ-
ભારતને અંડર-19 વર્લ્ડ કપની સેમિફાઇનલની ટિકિટ કેવી રીતે મળશે?
અંડર-19 વર્લ્ડ કપની સેમીફાઈનલ માટે ટીમ ઈન્ડિયાનું સમીકરણ સરળ છે. જો ભારત પાકિસ્તાનને હરાવવામાં સફળ રહેશે તો તે સુપર-6માં પોઈન્ટ ટેબલમાં પ્રથમ સ્થાને રહીને સેમીફાઈનલ માટે ક્વોલિફાઈ કરશે. આ સાથે જ જો ટીમ ઈન્ડિયાને પાકિસ્તાન સામે હારનો સામનો કરવો પડે તો પણ ટીમ ઈન્ડિયા પાસે સેમીફાઈનલમાં પહોંચવાની તક રહેશે.
ભારતનો નેટ રન રેટ પાકિસ્તાન કરતા ઘણો સારો છે. આયુષ મ્હાત્રેની ટીમને પાકિસ્તાન સામે હારનો સામનો કરવો પડે તો પણ ટીમ ઈન્ડિયાએ માત્ર મોટી હાર ટાળવી પડશે.
પાકિસ્તાને કેલ્ક્યુલેટર ખોલવા પડશે
જો પાકિસ્તાનને અંડર-19 વર્લ્ડ કપની સેમીફાઈનલની ટિકિટ મેળવવી હોય તો તેણે ભારતને હરાવવું પડશે એટલું જ નહીં પરંતુ મોટી જીત પણ નોંધાવવી પડશે. હાલમાં પાકિસ્તાનના ખાતામાં 4 પોઈન્ટ છે, જો મેન ઇન ગ્રીન ટીમ ભારતને હરાવવામાં સફળ રહેશે તો તે ભારતની બરાબરી 6 પોઈન્ટ કરી શકશે. મેચ જીતવાની સાથે પાકિસ્તાનને નેટ રન રેટમાં પણ ભારતને હરાવવું પડશે.
