નવી દિલ્હીઃ ફ્રાંસના રાષ્ટ્રપતિ ઈમેન્યુઅલ મેક્રોન મંગળવારે ભારત પહોંચ્યા હતા. તેમનો ઉદ્દેશ્ય ભારત અને ફ્રાન્સ વચ્ચે વ્યૂહાત્મક ભાગીદારીને વધુ મજબૂત કરવાનો છે. મુંબઈ એરપોર્ટ પર મહારાષ્ટ્રના મુખ્ય પ્રધાન દેવેન્દ્ર ફડણવીસ અને મહારાષ્ટ્ર અને ગુજરાતના રાજ્યપાલ આચાર્ય દેવવ્રતે તેમનું સ્વાગત કર્યું હતું.
વિદેશ મંત્રાલયના જણાવ્યા અનુસાર, વડાપ્રધાન નરેન્દ્ર મોદી રાષ્ટ્રપતિ મેક્રોન સાથે દ્વિપક્ષીય વાતચીત કરશે. બંને નેતાઓ સંયુક્ત રીતે ભારત-ફ્રાન્સ યર ઓફ ઈનોવેશન 2026ની શરૂઆત પણ કરશે. સોશિયલ મીડિયા પ્લેટફોર્મ ‘X’ પર એક પોસ્ટ દ્વારા રાષ્ટ્રપતિ મેક્રોનનું સ્વાગત કરતા વિદેશ મંત્રાલયે કહ્યું કે આ મુલાકાત ભારત-ફ્રાન્સ વ્યૂહાત્મક ભાગીદારીને વધુ વેગ આપશે.
ભારત જતા પહેલા રાષ્ટ્રપતિ મેક્રોને ‘X’ પર લખ્યું હતું કે તેઓ મુંબઈથી નવી દિલ્હીની ત્રણ દિવસની મુલાકાતે આવી રહ્યા છે, જેથી બંને દેશો વચ્ચે વ્યૂહાત્મક ભાગીદારીને વધુ આગળ લઈ શકાય. તેમણે કહ્યું કે તેમની સાથે વ્યાપાર, ઉદ્યોગ, સંસ્કૃતિ અને ડિજિટલ ક્ષેત્ર સાથે સંકળાયેલા અગ્રણી લોકો પણ ભારત આવી રહ્યા છે, જેઓ બંને દેશો વચ્ચેના સંબંધોને મજબૂત બનાવવામાં મહત્વપૂર્ણ ભૂમિકા ભજવે છે.
તેમણે વધુમાં કહ્યું હતું કે, “સાથે મળીને, અમે અમારા સહયોગને આગળ લઈ જઈશું. કાલે મળીશું, મારા પ્રિય મિત્ર નરેન્દ્ર મોદી.” રાષ્ટ્રપતિ મેક્રોન ભારત સરકારના આમંત્રણ પર ‘AI ઈમ્પેક્ટ સમિટ’માં ભાગ લેવા આવી રહ્યા છે. મુલાકાત દરમિયાન, મેક્રોન 19 ફેબ્રુઆરીએ નવી દિલ્હીમાં AI ઇમ્પેક્ટ સમિટમાં પણ ભાગ લેશે.
મંગળવારે મુંબઈમાં વડાપ્રધાન નરેન્દ્ર મોદી અને રાષ્ટ્રપતિ મેક્રોન વચ્ચે મુલાકાત થશે. આ દરમિયાન, બંને નેતાઓ ભારત-ફ્રાન્સ વ્યૂહાત્મક ભાગીદારી હેઠળ અત્યાર સુધીની પ્રગતિની સમીક્ષા કરશે અને પ્રાદેશિક અને વૈશ્વિક મુદ્દાઓ પર વિચારોનું આદાનપ્રદાન કરશે.
ફ્રાન્સના રાષ્ટ્રપતિ 17 થી 19 ફેબ્રુઆરી દરમિયાન ભારતની સત્તાવાર મુલાકાતે આવશે. રાષ્ટ્રપતિ મેક્રોનની ભારતની આ ચોથી મુલાકાત છે અને મુંબઈમાં તેમનો પ્રથમ સત્તાવાર કાર્યક્રમ છે. મંગળવારે બપોરે લગભગ 3:15 વાગ્યે, વડા પ્રધાન મોદી અને રાષ્ટ્રપતિ મેક્રોન મુંબઈના લોક ભવનમાં દ્વિપક્ષીય મંત્રણા કરશે.
