નવી દિલ્હીઃ ભારત અને ન્યુઝીલેન્ડ વચ્ચે 8 માર્ચે T20 વર્લ્ડ કપ 2026ની ફાઈનલ રમાશે. અમદાવાદના નરેન્દ્ર મોદી સ્ટેડિયમ ખાતે યોજાશે. મેચ સાંજે 7 વાગ્યાથી રમાશે. સેમી ફાઇનલમાં ભારતે ઇંગ્લેન્ડને અને ન્યૂઝીલેન્ડે દક્ષિણ આફ્રિકાને હરાવીને ફાઇનલમાં પ્રવેશ મેળવ્યો હતો.
ન્યુઝીલેન્ડ સામેની ફાઈનલ મેચ ભારત માટે ઘણી મુશ્કેલ છે. તેનું કારણ ટી20 વર્લ્ડ કપનો ઈતિહાસ છે, જે ન્યુઝીલેન્ડની તરફેણમાં છે. ટી-20 વર્લ્ડ કપમાં ભારતીય ટીમ ક્યારેય ન્યુઝીલેન્ડ સામે જીતી શકી નથી. બંને દેશો વચ્ચે અત્યાર સુધીમાં 3 મેચ રમાઈ છે અને ત્રણેય મેચ ન્યૂઝીલેન્ડે જીતી છે.
બંને દેશો વચ્ચે પ્રથમ મેચ T20 વર્લ્ડ કપ 2007 દરમિયાન રમાઈ હતી. પ્રથમ બેટિંગ કરતા ન્યૂઝીલેન્ડે તમામ વિકેટ ગુમાવીને 190 રન બનાવ્યા હતા. ભારતીય ટીમ 180 રન બનાવી શકી અને 10 રનથી મેચ હારી ગઈ.
T20 વર્લ્ડ કપ 2016માં બીજી મેચ રમાઈ હતી. પ્રથમ બેટિંગ કરતા ન્યૂઝીલેન્ડે 7 વિકેટે 126 રન બનાવ્યા હતા. ભારતીય ટીમ 79 રનમાં સમેટાઈ ગઈ હતી અને 47 રનથી મેચ હારી ગઈ હતી. T20 વર્લ્ડ કપમાં બંને ટીમોની ત્રીજી અને છેલ્લી મુલાકાત 2021 વર્લ્ડ કપ દરમિયાન થઈ હતી. પ્રથમ બેટિંગ કરતા ભારતે 7 વિકેટે 110 રન બનાવ્યા હતા. ન્યૂઝીલેન્ડે 2 વિકેટના નુકસાને 111 રન બનાવીને 8 વિકેટે મેચ જીતી લીધી હતી.
આ રીતે ભારતીય ટીમ ટી20 વર્લ્ડ કપમાં ન્યૂઝીલેન્ડ સામેની પ્રથમ જીતની રાહ જોઈ રહી છે. જો આપણે એકંદર આંકડાઓ પર નજર કરીએ તો ટી-20માં ન્યૂઝીલેન્ડ સામે ભારતીય ટીમનો દબદબો છે. બંને દેશો વચ્ચે અત્યાર સુધીમાં 30 મેચ રમાઈ છે. ભારતીય ટીમે 18 મેચ જીતી છે જ્યારે ન્યુઝીલેન્ડને 11 મેચમાં સફળતા મળી છે. 1 મેચ ટાઈ રહી છે.
વર્લ્ડ કપ પહેલા પણ ન્યુઝીલેન્ડ અને ભારત વચ્ચે 5 મેચની દ્વિપક્ષીય T20 સીરીઝ રમાઈ હતી. ભારતીય ટીમે આ હોમ સિરીઝમાં ન્યૂઝીલેન્ડને 4-1થી હરાવ્યું હતું. ટીમ ઈન્ડિયા પાસે 8 માર્ચે ન્યુઝીલેન્ડને હરાવીને જીતની રાહનો અંત લાવવાની અને બેક ટુ બેક T20 વર્લ્ડ કપ ટાઇટલ જીતનારી પ્રથમ ટીમ બનવાની તક છે.
