ઈરાનના રાષ્ટ્રપતિ મસૂદ પેજશીક્યાને ખાડી દેશો પર હુમલો કર્યા બાદ માફી માંગતા પોતાના નિવેદન પર સ્પષ્ટતા આપી છે. એક દિવસ પહેલા તેણે હુમલા માટે તેના પાડોશી દેશોની માફી માંગી હતી, પરંતુ રવિવારે તેણે કડકતા બતાવી હતી અને કહ્યું હતું કે દુશ્મન (અમેરિકા, ઈઝરાયેલ)એ તેની વાતની ગેરસમજ કરી છે. જો પડોશી દેશો તરફથી હુમલો થશે તો તેહરાન જડબાતોડ જવાબ આપશે. નોંધનીય છે કે પેજશીકયાનના માફીનો વીડિયો વાયરલ થયા બાદ અમેરિકી રાષ્ટ્રપતિ ટ્રમ્પે કહ્યું હતું કે ઈરાન ઘૂંટણિયે આવી ગયું છે.
રવિવારના રોજ, પેજ શિકયાન દ્વારા તેમના નિવેદનની સ્પષ્ટતા કરતો એક વીડિયો સંદેશ બહાર પાડવામાં આવ્યો હતો. આ સંદેશમાં તેણે કહ્યું હતું કે, “મારા શબ્દોને દુશ્મનો દ્વારા ગેરસમજ કરવામાં આવી છે. જ્યારે અમારા પર હુમલો કરવામાં આવે છે, ત્યારે અમારી પાસે જવાબ આપવા સિવાય કોઈ વિકલ્પ રહેતો નથી. અમારા પર જેટલું વધુ દબાણ કરવામાં આવશે, તેટલો જ અમારો જવાબ મજબૂત હશે. અમારું ઈરાન કોઈપણ ધમકી, જુલમ કે આક્રમકતા સામે સરળતાથી વશ નહીં થાય.”
તમને જણાવી દઈએ કે, ઈરાનના રાષ્ટ્રપતિની આ ટિપ્પણી એવા સમયે આવી છે જ્યારે અમેરિકા અને ઈઝરાયલે તેહરાનના ઓઈલ ડેપો પર જોરદાર બોમ્બમારો કર્યો છે. ઈરાનની રાજધાનીની ચારે બાજુ કાળા વાદળો ઘેરાઈ ગયા છે. બીજી તરફ ઈરાને પણ ખાડી દેશો પર હુમલા ચાલુ રાખ્યા હતા. ઈરાન તરફથી બેલેસ્ટિક મિસાઈલ અને ડ્રોન સતત બહેરીન, કુવૈત, દુબઈ, યુએઈને નિશાન બનાવી રહ્યા છે. આ સિવાય કતાર સહિત અન્ય દેશોમાં સતત વિસ્ફોટો થઈ રહ્યા છે. દુબઈમાં બેલેસ્ટિક મિસાઈલ બ્લાસ્ટમાં બે લોકોના મોત થયા છે, જ્યારે 12થી વધુ લોકો ઘાયલ થયા છે.
