પેરિસ
ફ્રાન્સની પ્રખ્યાત ફૂટબોલ ક્લબ પેરિસ સેન્ટ-જર્મન (PSG) એ સ્ટાર ફૂટબોલર લિયોનેલ મેસ્સીને ક્લબની પરવાનગી વિના સાઉદી અરેબિયાની મુસાફરી કરવા બદલ સસ્પેન્ડ કરી દીધો છે. આ બાબતથી પરિચિત વ્યક્તિએ નામ ન આપવાની શરતે એસોસિએટેડ પ્રેસને જણાવ્યું હતું.
વ્યક્તિએ સસ્પેન્શનની લંબાઈનો ઉલ્લેખ કર્યો નથી પરંતુ ફ્રેન્ચ મીડિયાએ જણાવ્યું હતું કે મેસ્સીને બે અઠવાડિયા માટે સસ્પેન્ડ કરવામાં આવ્યો છે. મેસ્સીના બે સપ્તાહના સસ્પેન્શનનો અર્થ છે કે તે પીએસજીની આગામી બે મેચો ચૂકી જશે.
વ્યક્તિએ એપીને જણાવ્યું કે વર્લ્ડ કપ ચેમ્પિયન મેસ્સી ન તો ટ્રેનિંગ કરી શકે છે અને ન તો ટીમ સાથે રમી શકે છે. તેને સસ્પેન્શનના સમયગાળા માટે પણ ચૂકવણી કરવામાં આવશે નહીં. તેણે ઉમેર્યું હતું કે પીએસજીએ મેસ્સીને મુસાફરી કરવાની મંજૂરી આપવાનો ઇનકાર કર્યો હતો. 35 વર્ષીય મેસ્સીનો સાઉદી અરેબિયામાં પ્રવાસનને પ્રોત્સાહન આપવા માટે મધ્ય પૂર્વના દેશ સાથે બિઝનેસ કોન્ટ્રાક્ટ છે.
આર્જેન્ટિનાના સ્ટાર બે વર્ષ પહેલા બાર્સેલોના છોડીને PSGમાં જોડાયો હતો. તેમના નેતૃત્વમાં આર્જેન્ટિનાએ ગયા વર્ષે વર્લ્ડ કપ જીત્યો હતો. મેસ્સીએ સસ્પેન્શન અંગે કોઈ જાહેર ટિપ્પણી કરી નથી.