રવિવારે રશિયા અને યુક્રેન વચ્ચે ઉર્જા યુદ્ધવિરામ થયો હતો. આનો અર્થ એ થયો કે બંને દેશો હવે એકબીજાના ઉર્જા માળખા પર હુમલો નહીં કરે. અમેરિકી રાષ્ટ્રપતિ ડોનાલ્ડ ટ્રમ્પે આ યુદ્ધવિરામની જાહેરાત કરી છે. ટ્રમ્પે વધુ વિગતો વગર પોતાના ટ્રુથ સોશિયલ નેટવર્ક પર લખ્યું, “તત્કાલ અસરકારક, રશિયા અને યુક્રેન વચ્ચેના યુદ્ધમાં ઊર્જા યુદ્ધવિરામ છે. બંને પક્ષો સંમત થયા છે. તેને તોડશો નહીં.” આ પહેલા અમેરિકી રાષ્ટ્રપતિ ડોનાલ્ડ ટ્રમ્પે કહ્યું હતું કે યુક્રેનને હવે નવા રાષ્ટ્રપતિની જરૂર છે. ટ્રમ્પે યુક્રેનના રાષ્ટ્રપતિ વોલોદિમિર ઝેલેન્સ્કી પર રશિયા-યુક્રેન યુદ્ધને સમાપ્ત કરવા માટે પૂરતું કામ ન કરવાનો આરોપ લગાવ્યો અને અમેરિકામાં ડીઝલના વધતા ભાવ માટે તેમને જવાબદાર ગણાવ્યા.
ટેનેસી જતા પહેલા વ્હાઇટ હાઉસ ખાતે પત્રકારો સાથે વાત કરતા ટ્રમ્પે કહ્યું, “હું સૂચન કરું છું કે યુક્રેનને એવો નવો નેતા પસંદ કરવો જોઈએ જે સમાધાન કરી શકે. ઝેલેન્સ્કી ઘણી સમજૂતી કરી શક્યા હોત, પરંતુ મને ખબર નથી કે તેણે ક્યારેય કેમ ન કર્યું.” ટ્રમ્પના આ નિવેદનનું રશિયાએ સ્વાગત કર્યું છે. “રાષ્ટ્રપતિ ટ્રમ્પ હવે એવા લોકો સાથે જોડાયા છે જેઓ માને છે કે યુક્રેનને શાંતિ પર ધ્યાન કેન્દ્રિત કરે તેવા નેતૃત્વની જરૂર છે, ઝેલેન્સકી જેવા યુદ્ધને ઉશ્કેરવા પર નહીં,” કિરીલ દિમિત્રીવે, રશિયન રાષ્ટ્રપતિ વ્લાદિમીર પુતિનના આર્થિક દૂત, ‘X’ પર લખ્યું.
ડોનાલ્ડ ટ્રમ્પનું આ નિવેદન અમેરિકા અને રશિયા વચ્ચે ડીઝલ કરારની ઝેલેન્સકીની આકરી ટીકા બાદ આવ્યું છે. અમેરિકાએ આગામી મધ્યસત્ર ચૂંટણી પહેલા ઈંધણની વધતી કિંમતોને અંકુશમાં લેવા માટે રશિયા પાસેથી ડીઝલ ખરીદવાનો સોદો કર્યો છે. યુરોપિયન દેશોના અધિકારીઓએ પણ આ સોદા પર નિરાશા વ્યક્ત કરી છે અને ચેતવણી આપી છે કે તે યુદ્ધ માટે રશિયાને આર્થિક મદદ કરશે. પુતિન સાથે વાત કર્યા બાદ ટ્રમ્પે જાહેરાત કરી હતી કે, “રશિયા અમેરિકન અને વૈશ્વિક બજારોમાં તરત જ ત્રણ લાખ ટનથી વધુ ડીઝલ ઇંધણની સપ્લાય કરશે, જ્યારે વધારાના પાંચ લાખ ટન ડીઝલ નવેમ્બર મહિનામાં પહોંચાડવામાં આવશે.”
