યમનમાં ભારતીય દૂતાવાસે શુક્રવારે જણાવ્યું હતું કે તે યમનના દરિયાકાંઠે કથિત રીતે એક બોટમાં સવાર 14 ભારતીય નાગરિકો સાથે સંકળાયેલી ઘટના અંગે માહિતી એકત્ર કરી રહી છે અને આ માટે વિવિધ પક્ષોનો સંપર્ક કર્યો છે. કેટલાક આરબ મીડિયા આઉટલેટ્સે ગુરુવારે યમનના હુથી બળવાખોર દળોના પ્રવક્તા યાહ્યા સરીને ટાંકીને દાવો કર્યો હતો કે સાઉદી અરેબિયન દળોએ લાલ સમુદ્રમાં યમનના કિનારે ઉકર ટાપુ નજીક ભારતીય બોટને નિશાન બનાવી હતી.
હુથીએ કહ્યું- અમે બચાવવામાં વ્યસ્ત છીએ
સરીએ કહ્યું કે બોટમાં 14 ભારતીય નાગરિકો સવાર હતા અને હુથી દળો તેમને બચાવવાનો પ્રયાસ કરી રહ્યા હતા. તેમણે કહ્યું કે આ ઘટના અંગે વધુ માહિતી હવે પછી આપવામાં આવશે. ભારતીય દૂતાવાસે શુક્રવારે સોશિયલ મીડિયા પર એક પોસ્ટમાં જણાવ્યું હતું કે, “અમે 22 ઓક્ટોબરે યમનના દરિયાકાંઠે બનેલી ઘટના વિશે વધુ માહિતી એકત્રિત કરવાના પ્રયાસો ચાલુ રાખીએ છીએ…”
ઈરાન સમર્થિત હુથી બળવાખોરો અને સાઉદી અરેબિયા વચ્ચે વધી રહેલા સંઘર્ષ વચ્ચે આ ઘટના બની છે. બંને પક્ષો એકબીજાના ઈન્ફ્રાસ્ટ્રક્ચરને નિશાન બનાવી રહ્યા છે. દૂતાવાસે કહ્યું, ‘વિસ્તારમાં વર્તમાન સંઘર્ષની સ્થિતિને જોતા, આ સમયે સચોટ માહિતી ઉપલબ્ધ નથી. અમે ઘટનાના સંજોગો અને હકીકતો જાણવા માટે વિવિધ પક્ષોનો સંપર્ક કર્યો છે. અમને આશા છે કે અધિકૃત માહિતી મળતાં જ અમે વધુ માહિતી શેર કરી શકીશું.
