અંબાજી પંથકમાં આજે અચાનક વાતાવરણમાં પલટો આવ્યો હતો. તે સમયે દિવસે અંધારું હતું અને આકાશ કાળા વાદળોથી ઢંકાયેલું હતું. આ પછી યાત્રાધામ અંબાજીમાં વરસાદની જોરદાર એન્ટ્રી થઈ હતી. અંબાજી અને આસપાસના વિસ્તારોમાં ધોધમાર વરસાદ પડી રહ્યો છે. જેના કારણે સમગ્ર વિસ્તારમાં પાણી ભરાઈ ગયા છે. અંબાજીના મુખ્ય માર્ગો સહિત અન્ય માર્ગો પર નદીની જેમ પાણી વહેતા જોવા મળે છે. અંબાજીના નીચાણવાળા વિસ્તારોમાં સતત વરસાદી પાણી ભરાવાના કારણે લોકોને પણ ભારે મુશ્કેલીનો સામનો કરવો પડી રહ્યો છે.