અમદાવાદઃ અમદાવાદ ક્રાઈમ બ્રાન્ચ અને DRIના સંયુક્ત ઓપરેશનમાં મહારાષ્ટ્રમાંથી રૂ.500 કરોડનું ડ્રગ્સ ઝડપાયું છે. આ કેસના મુખ્ય આરોપી જીતેશ હિન્હોરિયા (પટેલ)ની ફેક્ટરી અને ઘર પર દરોડા પાડ્યા બાદ જીતેશે DRIની કસ્ટડીમાં પોતાની ગરદન અને હાથની નસો કાપીને આત્મહત્યાનો પ્રયાસ કર્યો હતો.
- ડીઆરઆઈ અને અમદાવાદ ક્રાઈમ બ્રાન્ચની સંયુક્ત તપાસ દરમિયાન આરોપીએ તેની ગરદન અને હાથની નસો કાપી નાખી હતી.
- અમદાવાદ ક્રાઈમ બ્રાન્ચ અને DRIના સંયુક્ત ઓપરેશનમાં મહારાષ્ટ્રમાંથી રૂ.500 કરોડનું ડ્રગ્સ ઝડપાયું હતું.
અમદાવાદ ક્રાઈમ બ્રાન્ચ અને DRI અમદાવાદ ઝોનલ યુનિટને મળેલી ચોક્કસ માહિતીના આધારે, 20 ઓક્ટોબરે મહારાષ્ટ્રના છત્રપતિ શંભાજીનગરમાં સર્ચ ઓપરેશન શરૂ કરવામાં આવ્યું હતું. જેમાં આરોપી જીતેશ હિનોરિયાના ઘરેથી 23 કિલો કોકેઈન, 2.9 કિલો મેફેડ્રોન અને 30 લાખની રોકડ મળી આવી હતી. આ કેસમાં આરોપી જીતેશ હિન્હોરિયા અને સંદીપ કુમાવત (બંને મહારાષ્ટ્ર)ની ધરપકડ કરી વધુ તપાસ ડીઆરઆઈ દ્વારા હાથ ધરવામાં આવી છે.
પ્રાપ્ત માહિતી અનુસાર આ કેસમાં મુખ્ય આરોપી જીતેશ અને તેના સાગરિત સંદીપ કુમાવત સહિત ત્રણ લોકોની ધરપકડ કરીને તપાસ કરવામાં આવી રહી છે, આ લોકો ઓફિસ અને ફેક્ટરીમાંથી કેટામાઈન તૈયાર કરીને દવાની આડમાં વિદેશમાં પાર્સલ સપ્લાય કરતા હતા. આરોપી જીતેશ અને સંદીપ અગાઉ કેમિકલ ફેક્ટરીમાં કામ કરતા હતા. આ ફાર્મા કંપનીમાં કામ કરતી વખતે તેઓ દવા બનાવવાની ફોર્મ્યુલા શીખ્યા અને ત્યાર બાદ બંનેએ દવાનો વ્યવસાય શરૂ કર્યો.