ડીસાના કાંટ ગામે આજે UGVCL અને ગ્રામ્ય પ્રમુખોની મહત્વની બેઠક મળી હતી. જેમાં ગામને જિલ્લાનું સૌપ્રથમ સૌર ઉર્જા આધારિત વીજ સ્વનિર્ભર ગામ બનાવવા અંગે ચર્ચા કરવામાં આવી હતી.સરકાર દ્વારા હાલમાં સમગ્ર દેશમાં ગ્રીન એનર્જી અંગેનું અભિયાન ચાલી રહ્યું છે. જે અંતર્ગત યુજીવીસીએલના અધિકારીઓ દરેક ગામમાં દરેક ઘર પર સોલાર પેનલ લગાવીને દરેક ઘરને વીજળીમાં સ્વનિર્ભર બનાવવાના પ્રયાસો કરી રહ્યા છે. જે અંતર્ગત આજે ડીસા તાલુકાના કાંટ ગામે યુજીવીસીએલના અધિકારીઓ અને ગામના આગેવાનોની બેઠકનું પણ આયોજન કરવામાં આવ્યું હતું. અધિકારીઓએ ખેડૂતો અને ગ્રામજનોને સરકારની સોલાર પેનલ રૂફ ટોપ યોજના વિશે વિસ્તૃત માહિતી આપી હતી. સોલાર પેનલ કઈ રીતે ગ્રીન એનર્જી પેદા કરી શકે છે અને પર્યાવરણ અને દેશના વિકાસને ફાયદો પહોંચાડી શકે છે તેની વિસ્તૃત માહિતી પણ તેમણે આપી હતી.
આ અંગે ગામના સરપંચ હિતેશભાઈ ચૌધરી અને આગેવાન હરજીભાઈ પટેલે જણાવ્યું હતું કે, સરકારે ગ્રીન એનર્જી માટે અભિયાન શરૂ કર્યું છે. આ માટે આજે અમારા ગામમાં યુજીવીસીએલના અધિકારીઓની બેઠક પણ મળી હતી. જેમાં તેમણે આ પેનલો કેવી રીતે લગાવી શકાય છે, તેનો કેટલો ખર્ચ થાય છે, કેટલો ફાયદો થાય છે તેની સંપૂર્ણ માહિતી આપી હતી અને ગામમાં સોલાર પેનલ લગાવ્યા બાદ માત્ર પર્યાવરણને જ નહીં પરંતુ લોકોને આર્થિક રીતે પણ ફાયદો થાય છે. તેમણે વધુમાં જણાવ્યું કે કેટલાક ગામોમાં લોકોએ બે વર્ષ પહેલા સોલાર પેનલ લગાવી હતી. તેઓએ બે વર્ષમાં સોલાર પેનલ લગાવવાનો ખર્ચ પણ ચૂકવી દીધો છે અને હવે તેઓ દર વર્ષે વીજળીના બિલમાં નાણાં બચાવી રહ્યા છે. તેથી, અમે અમારા ગામને બનાસકાંઠા અને ગુજરાતનું સૌપ્રથમ સોલાર પેનલ આધારિત ગ્રીન એનર્જી ઉત્પાદન અને વીજળીથી સ્વનિર્ભર ગામ બનાવવાનો નિર્ધાર દર્શાવ્યો છે.